Pynieng ka Citizen Forum ia U Bah Paul Lyngdoh, kum u kyrtong MP

Shillong: Ka kynhun jong ki riew paidbah ka Citizen Forum jong ka jylla ka la pynlong ia ka jingiakynduh ban rai halor ban pynieng ia u kyrtong na ka bynta ka eleksion Rajya Sabha 2020 kum ba ka Election Commission jong ka ri India ka la dep ban pynbna ba kan pynlong ha ka 26 tarik u Lber 2020.

Na ka Forum ki la iathuh ba ki la ioh jingtip lyngba ki ladpathai khubor ba ka party NPP ka la rai ba kan pynieng ia u bah W. R. Kharlukhi kum u kyrtong, hynrei na ka liang ka Forum, hadien ba ka la dep ban ia mir bad ki katto katne ki seng sain pyrthei jong ka jylla ban pynieng ia bah Paul Lyngdoh kum u kyrtong ba ia mon lang ban ia khun ia ka eleksion Rajya Sabha.

U bah Paul Lyngdoh u ba long u nongialam barim jong ka seng ki samla pule ka Khasi Student Union (KSU), U General Secretary u ba nyngkong jong ka North East Students’ Organisation ( NESO),u nongsheng ia ka Khun Hynniewtrep National Awakening Movement ( KHNAM) , u la long kum u MLA jong ka Jaiaw Constituency 2 sien ka kynti bad u MLA barim jong ka constituency ka ba la phiah ka 18 West Shillong Constituency bad mynta u dei u MDC jong ka Jaiaw Constituency . U dei ruh u Working President jong ka UDP. Na ka Forum ki la sngewdei eh ban jied ia u na mar ba u long u ba la biang ban mihkhmat na ka bynta ka imlang sah lang, ka jylla baroh ka dei ban ai ka jingkyrshan ia u ba yn mih khmat na ka jylla ha Rajya Sabha namar ba u long u nongialam u ba shemphang, khamtam ha ka por mynta ba ka jylla ka dang mad ia ki bun ki phang ki ba hap ban pynsngewthuh ia ka Sorkar pdeng halor ka CAA, ILP, NRC bad kiwei kiwei.

Ka long ka jingdonkam jong ka por ban phah ia u bah Paul Lyngdoh kum u kyrtong sha Rajya Sabha namar ba u la long u ba lah biang ha ka sain pyrthei , na ka liang ka Forum ki la buh ka jingkyntu ia baroh ki MLA ba kin jied ia u bah Paul Lyngdoh kum u dkhot sha Rajya Sabha.

Kane ka long kum ka kyrwoh ba la phah da u bah P Nongkynrih na Pynthorbah, u bah M Kharkamni na Mawlai bad u bah B Kharkongor na Mawpat Mawpat.