Shillong: U MM Danggo, MLA barim jong ka seng Congress, ula pyniasoh pura ialade sha ka seng National People’s Party (NPP), ha ka ophis jong katei ka seng, ha Lachumiere, Shillong.
U MM Danggo, uba dang ia khublei bad U Dr WR Kharlukhi, President jong ka seng NPP:Wlytan
Haba kren sha ki kotkhubor, hadien ba ula pyniasoh ialade sha ka NPP, u pynpaw ia ka jingkyrmen, ba un rah da kaba suk, ha ka elekshon shiteng samoi, ka ban sa long shen ha Ranikor, ha kaba un iakhun, kum u kandidet jong ka seng NPP.
U Danggo, u pynpaw, ba um sngew khuslai satia ia kiwei pat ki seng, kiba ialeh pyrshah ia u, namar ba ula ju mad ia kiba kum kitei ki jingiakhun ha ki bun bun sien ba ladep, hynrei, ula iai jop ha ki elekson ba ladep, namar ba ki paidbah, ki don ryngkat bad u. U Danggo, u pynpaw ruh ba ka thong kaba don ha ka jinglong nongialam jongu, ka long ba u kwah ban iohi ia ka Civil Sub Division ha Ranikor, ha ka por ba u long u nongmihkhmat jong katei ka Thain.