Shillong: U Dilliram G Marak u kyrtong shimet uba la ia khun ha ka elekshon MLA na Selsella konstitwensi u la wan ban pyniasoh sha ka seng NPP ha ka jingialang paidbah kaba la long ha Abima. U Dilliram u la shah rem ha ka elekshon MLA 2018 bad u la ioh 3296 vote, u la wan ban ia soh sha ka NPP ban kyrshan ia u kyrtong katei ka seng u ban ia khun ha ka elekshon shiteng samoi u Ferlin C A Sangma.
Ha katei ka jingialang la don u myntri rangbah ka jylla u Conrad K Sangma, bad kiwei pat ki nongialam ka NPP ba kynthup ia u Working President Semford B. Sangma, CEM GHADC Dipul Marak, Chairman GHADC Denang T. Sangma kumjuh u kyrtong jong katei ka seng na Selsella u Ferlin C.A. Sangma. Haba pdiang sngewbha ia u Diiliram u Conrad u la ong ba u de iu briew uba don ka nongrim ban shakri ia ki paidbah bad u la ong ruh ba ka jingwan ia soh jong u sha ka NPP kan pynkhlaiñ shuh shuh ia katei ka seng ban ioh jingjop ha ka elekshon shiteng samoi.
U Conrad u la ong ba ka elekshon shiteng samoi ka ia pher bha na ka elekshon kaba ju long bad ki paidbah kim dei ban sngewthuh bakla iano ban vote bad ki dei ruh ban sngewthuh ba ka NPP ka don ha ka sorkar bad u la kular ba ka Selsella kan dei ka konstitwensi kaba ka sorkar kan phaikhmat na ka bynta ka roi ka par. U Conrad u la ong ruh ba ha kine ki 8 bnai ka NPP kam shym la shongthait ban pyntyllun ia ki kam pynroi kylleng ka jylla wat hapdeng kiba bun ki jingeh.