Pyniasoh ki spah ngut sha ka seng Congress ha Resubelpara

Shillong: Kumba 100ngut ki riew paidbah, ki la pyniasoh ialade sha ka Indian National Congress (INC), hynnin ka sngi ha Resubelpara.

Katei ka jingleit pyniasoh jong kitei ki spah ngut, ka dei ha ka jingdon lang jong U Richard Marak, President MPYC, U Zenith Sangma, Secretary AICC lem bad kiwei de ki nongialam jong katei ka seng sain pyrthei.
Ha ka jingkren jong U Zenith Sangma, ula pynpaw ba u paidlang ka Jylla, ula ngiah ia ka seng BJP bad ka seng NPP bad kumta, ula ai jingmut ruh ia u paidlang ka Garo Hills, ba kin jied ia U Mukul Sangma, u nongialam uba khraw jong ka Garo hills, ha kane ka elekshon MP, ka ban sa wan.
U Richard Marak, President ka MPYC, ula pynsngew ba ka dei ka seng NPP, kaba la wan ialam ia ka seng BJP ha Meghalaya bad kumta, ula ong ba lada kwah ban pynduh ia ka BJP, dei ban pynduh jait shwa ia ka NPP hapoh ka jingialam U Conrad Sangma. “Ka dei tang ka Congress, kaba lah ban ialeh pyrshah ia ka BJP ha ka sorkar pdeng bad kane ka dei ka kabu kaba khraw ban weng noh ia u paidlang ka Ri na ki kam thombor jong ka seng BJP” ong shuh U Marak.