Arngut ki MLA jong ka seng Congress, ki la pyniasoh ialade sha ka seng BJP hynnin ka sngi. Kitei ki dei ki MLA na Goa bad kitei kiba pyniasoh sha ka BJP, ki long U Subhash Shirodkar bad U Dayanand Sopte, ha kaba ki la pyniasoh ha khmat U Piyush Goyal, myntri sorkar India, ha ka ophis heh duh jong ka seng BJP ha Delhi.
U Shirodkhar bad U Sopte, ki la mih na Panaji ha ka janmiet jong ka Lah Sngi U Blei, ha ryngkat bad u heh duh ka seng BJP ha Goa, U Vinay Tendulkar bad u myntri ka koit ka khiah ka sorkar Jylla, U Vishwajit Rane.
La iathuh ba kin dang don sa 2, 3ngut kiwei pat ki MLA jong ka seng Congress, ki ban dang iasoh BJP, ha ki khyndiat sngi ban sa wan.
Da ka jing iasoh BJP jong kitei ki arngut ki MLA, ka Congress, ka la hiar ka jingdon briew jongka sha ka 14ngut, na kaba ju don baroh shi katta 16ngut ki MLA. Kitei ki 2ngut, ki la dep risain ruh ia ka jinglong dkhot jongki, ha ka iing dorbar jong ka Goa, ha shwa ba kin pyniasoh ialade sha ka seng BJP.