Pyniap ki runar bad bret ia ka met ha wah Barak

Jowai, 18 Jymmang:
Ia ka metiap jong uwei u samla la lap ba ka per hynnin ka sngi ha wah Barah Karimganj District, katba uwei pat u dang jah rngai ha ryngkat ka kali Maruti Alto 800 ronglieh kaba don u No. ML11-1038.
Kitei ki ar ngut ki samla ki dei kiba la tip kyrteng kum u Amly Sutnga (20) u khun jong u ma Bili-stone Mallang bad u Bren Dkhar (20) kiba dei na ka shnong Moolamylliang, East Jaintia Hills District.
Ia ka metiap jong u samla Amly Sutnga la lap ba ka per ha ka wah Barak bad suki suki ka la kyntait sha kawah rit kaba iasoh bad katei ka wah bah, la iathuh u Rangbah shnong ka shnong Moolamylliang, u ma Ebor Dkhar.
La iathuh shuh shuh ba dei ha ka meit sngi U Blei ha ka por kumba 7:00pm eiei kitei ki ar ngut ki samla ki la pan kali na u ma Meker Sutnga ban leit booking.
La suba jur ba ka kynhun ki riewsniew bar jylla kiba la leh mynleh ban shimwai ia ka kali, ki la pyniap dusmon bad bret ia ka met jong ki ha katei ka wah Barah kaba heh. Ki pulit bad ki ba haiing hasem ki dang wad ban lap ia uba jah rngai bad kumjuh ia katei ka kali kaba la suba ba ka la shah rongtuh ha ki runar.