Pyniap ka GNLA ia u nonghikai skul hakhmat ki paidbah

Shillong, 18 Nailar:
Ka GNLA ka la pyniap ia u Headmaster jong ka Jingamgre SSA LP School u Madison Ch Marak hakhmat ki paid bah halor ki jingkynnoh ba utei u nonghikai u ia treilang bad ka sorkar ha ka thaiñ East Garo Hills. Ki tyllong khubor ki la iathuh ba shuwa ban pyniap ia utei u nonghikai ka GNLA ka la shoh la dat shuwa ia ki riew paidbah hadien katei ka patan ia u napdeng ki paidbah bad ka la pyniap. U heh pulit jong ka East Garo Hills u Davis Nestell R Marak u la ong ba la phah ia ki kynhun pulit ba leit shim ia katei ka metiap jong u bad ban tohkit ia ka jingjia. Katei ka jingjia ka la jia ha ka shnong kaba jngai tang kumba 15 kilomitar na Williamnagar sha shilliang wah Simsang kaba dei ruh ka ktem bah u Sohan D Shira ha ki por mynshuwa.