Pyni ka PRS, ia ki jingkren U Ma Vincent, Conrad, kong Wansuk ha Parliament

Shillong:Ka PRS Legislative Research, ka website kaba buddien ia ka jingtrei kam jong ki MLA, MP ha ka Ri India, ka don lut ia baroh ki jingshisha halor ka jing shim bynta jong ki MP, ha ka dorbar Parliament ha ka jingshong dorbar jongki, ha ka dorbar kaba 16 jong ka Lok Sabbha.

Katba kum ka jingthoh ha katei ka website, la pyni ba U Ma Vincent Pala, MP jong ka Shillong Lok Sabbha,u shim bynta 32 sien ha ki jing iatai nia kum u dkhot jong ka Lok Sabbha bad nangta u kylli jingkylli 264 tylli bad u leit rah ia ki Private Member bills 4 tylli bad ka jingleit dorbar jongu, ka long 92 percent.

Na ka liang jong U Conrad K Sangma, uba leit sha ka dorbar Lok Sabbha ha u Jymmang 2016, hadien ka jingkhlad noh jong U PA Sangma, la pyni ba u leit sha ka dorbar Lok Sabbha 48 percent bad nangta ba u shim bynta ha ki jing ia tainia san sien bad nangta ba u buh 16 tylli ki jing kylli bad um shym leit rah satia ia ki Private Members bill ha kitei ki sien ba lyngkot ba u don ha Lok Sabbha.

U Conrad, ula iehnoh kum u dkhot jong ka Lok Sabbha ha U Nailar 2018, hadien ba ula jop kum u dkhot jong ka dorbar Jylla na South Tura Constituency, kaba la mihkhmat da ka Agatha Sangma, ka para jongu hi.

Katei ka website ka pyni ba ka kong Wansuk Syiem kum ka dkhot jong ka Rajya Sabbha, ka shim bynta 84 sien ha ki jing ia tainia ha katei ka dorbar bad nangta ka kylli jingkylli 616 sien bad kam shym leit rah satia tang kawei ruh ka Private Member bill ha ka dorbar.