Pyni bor ka District Council ia ka hukum ka MUDA rPhah jingthoh sha ka MeECL bad PHE

Shillong,7 Naitung:
Ka Khasi Hills Autonomous District Council (KHADC) ka la pyni bor ia ka hukum ba la pynmih da ka MUDA ba ki paidbah ki donkam ban ioh jingbit na ka bynta ban shna iing shna sem na katei ka tnad wat kito ki ba shong basah ha kito ki jaka bym dei shuh kaba hap hapoh ka jingpeit ka MUDA. Lah ruh ban kdew ba ki paidbah mynta ki ia kynduh jingeh namar ba kim ioh ban tan bor ding khlem da ioh ia ka jingbit shna iing, na ka MUDA lymne kim lah ban tan um khlem da pyni ia ka jingbit ba la ai da katei ka tnad.
Halor katei ka jingiakynduh jingeh ki paidbah ka District ka la pyni bor ia ka MUDA da kaba phah jingthoh sha u Secretary ka MeECL, Lumjingshai , Shillong bad sha u Chief Executive Engineer ka Public Health Engineering , Meghalaya ba kim dei ban pynwit ia ka jingtan bording bad ka jingtan um ki paidbah kiba shong basah ha ki jaka ba dang hap hapoh ka jingpeit ka KHADC.
Ha katei ka jingthoh kaba la soi da u Secretary sha ka Executive Committee ka KHADC ka la ong ba ki la don ki Synjuk Rangbah Shnong kiba wan ia kynduh ia u CEM ka KHADC bad ki la pynpaw ia ka jingeh ba ki paidbah kiba shong basah hapoh ka jaka ba peit ka KHADC ki ia kynduh namar ka jingpyntreikam kymdit kyndit ka MUDA ia ka Shillong Master Plan Area da ka Meghalaya Urban Development Council ( MUDA) ha ki jaka ba peit ka Council ha kaba ym shym la shah ia ki ban tan bording ne ban tan um khlem da ioh jingbit na katei ka tnad.
Ha katei ka shithi ka KHADC ka la ong “Ban lait na ka jingshah pynshitom bad ka jingshah pynjynjar ki paidbah la hukum ia nga ba kyrpad sha phi ba phim dei ban shah pynbor ha ka Building Permission ka MUDA na ka bynta ban tan bording lane tan um kaba dei ka jingdonkam kaba ki paidbah ki donkam eh”.