Pynhiar pyrda Jubilee ka Sacred Hearth Theological College

Shillong, 27 Risaw:
Ka Sacred Heart Theological College, Mawlai ha ka 24, 25 bad 26 tarik une u bnai ki la pynlong ia ka concert “The Miracle Man” ha ka college auditorium. Da kane ka jing ia rwai ia tem, ka college ka la pynhap pyrda ia ka Platinum Jubilee jong ka college kaba la plie ha u bnai Nailur jong u snem ba la dep. Lymba kane ka concert, ka la pynshai sha kito kiba wan ban peit kai shaphang ki kambah ba la leh da u Jisu Khrist ar hajar snem mynshuwa. Ia kane ka tamasa jingrwai la thoh da U Fr. Barnes Mawrie, uba long U president jong ka college.
Ha ka jingpdiang sngewbha U Fr. Jose Vettathe, U Rector jong ka college,u la ong ba lyngba kane ka drama kan wanrah ia ka jingsngew ha ki paidbah nongpeitkai ia ka khubor bad ki kambah ba u Jisu u la leh. “Da kane ka concert ngi pynhap pyrda noh ia ka Platinum Jubilee jong ka college,” la ong U Fr. Rector. U la ong ruh ba kane ka concert shaphang ki kambah jong u Jisu ka long kaba shongkun ha une u snem jong ka jingngeit. U kyrmen ba lyngba kane ka concert kan pynim pat ia ka jingim Khristan jong ki briew, khamtam kito kiba la iaid sakma na ka jingngeit ha u Jisu Khrist. U la ong ruh ba ha une u snem jubilee ka college ka la lah ban pynlong bun kiwei pat ki programme bad kaba khamtam napdeng kine baroh ka long ka National Seminar ha kaba ki expert na kylleng ka ri ki la ia wan ban shim bynta.
Kane ka concert ka la sdang da ka jingkhot jong u Jisu ia ki saw ngut ki nongbud jong u harud ka wah Galilee bad nangta bud pat ki scene ha kaba la iohi ia ki kam phylla u Jisu. Kaba kut ka dei ka jingmihpat jong u Jisu na ka ba iap. Ka jingkhlehlang jong ki actor, ka riam ka beit, ka sound, ka lighting bad ki jingshad ba bun rukom ka pynitynnad ia ka stage ha kaba la pynlong ia ka musical concert. Ka jing-i-shongkun jong kane ka drama ka la pynshoh mynsiem ia kiba bun ki nongpeitkai ban nang kham pynrhem ia ka jingngeit jong ki ha U Jisu Khrist.