Pynher syrngiew u bom thok ki pulit ha Khyndailad

Shillong, 13 Lber:
Ha ka por 4:30 -5:00 baje eiei mynta ka janmiet ki paidbah ki la ia lynniar bad kyndeh myn siem ban iohi ba ka don ka synduk kaba la ieh ha Khyndailad khlem don ba kam trai, bad la suba jur ba hapoh katei ka synduk lah ban don u bomb uba la buh da ki runar.
Hynrei ha ka jing shisha katei ka synduk ka dei kaba la buh hi da ki pulit ka nongbah Shillong, ban peit ia ka jingtreikam ka CCTV kaba ki la wah ha Khyndailad. Katei ka jingbuh bomb thok ki pulit ha Khyndailad ka dei ruh ka jingleh mynleh kumno ban leh haba don ba buh bomb ha ki jaka paidbah, ne haba don ba ieh ia ki tiar ba ipher ha ka jaka kaba ia bun briew, kiba lah ban dei pynban u Bomb.
Ki pulit ki la leh ia katei ka mockdrill ha Khyndailad ban peit ia ka jingkhlain bor ka CCTV Camera kaba ka sorkar ka la pyndait ha ki jaka paidbah ka nongbah Shillong, da katei ka jingleh kan pyni haduh katno ka jingkhlain ka CCTV ban bat ia ka dur u briew uba la buh ia katei ka synduk , bad ka pyni ruh kaei ki pulit ki leh ban weng lada jia ba dei u bomb.
Kiba bun ki paidbah kiba iaid lynti lyngba ka Khyndailad da ki kjat ne da ki kali kim shym la tip ba ka dei ka jingleh mynleh ki pulit, hynrei namar ka jingialum briew ki la shim ba ki pulit ki dang pyrshang ban law ia u bomb uba la buh da ki runar, bad da katei ka jingbym tip kiba bun ki la mareh pynsted wut wut na katei ka jaka sha ki jaka ba kham pajih bad kiba bun ruh ki shu peit kai na jngai. Ka jingher syrngiew u paidbah ha katei ka jingleh mynleh buh bomb ki pulit ha se map kali ha Khyndailad ka dei namarba ki la iohi ba la pynbiang lut ki kali pynlip ding , ki kali kit nongpang ha katei ka jaka. La weng ia u bomb thok da ki pulit weng bomb kaba ialam da u Additional SP U Bibhuti Purkayastha.