Nongpoh: Wat la ka jingthmu ka Assam ban buh ktem Pulit ha Umru ka dang don hapdeng shibun ki jingpyrshah na kiba bun ki liang, hynrei na ka liang ka Sorkar Assam kam shem la pynsngap ia kitei ki jingpyrshah, naba ka la shna jubor ia katei ka Police Out Post ha shnong Umru bad kaba dang dei hapoh u Pud u sam ka Meghalaya.
Lah ruh ban pynkynmaw hangne, ba ha kine ki khyndiat Bnai kiba la dep, ka Sorkar Assam ka la thmu ban buh ia katei ka Police Out Post ha katei ka jaka, hynrei namar ba la mih ki jingpyrshah na ki Nongialam shnong lem bad ki Sengbhalang na Meghalaya, kumta ka la sangeh noh khlem da pyntrei shuh.
Ka Police Out Post kaba la wan shna jubor da ka Assam ha Umru, Ri Bhoi:Rupang
Haba kren bad u Nongthohkhubor, u Bah Alos Nongpoh, President ka Synjuk ki Rangbah Shnong Tyrso Area, u la ong ba katei ka jingwan shna biang da ka Assam ia katei ka ktem pulit, ka la sdang naduh mynsngi Saitjain bad naduh katei ka por ba la sdang ban shna, na ka liang ka Assam ka la pynbiang syndon da ki Battalion, na ka bynta ban pahara ha ka por ban dang shna ia katei ka ktem pulit.
Kumba ka long mynta ka jingstet ban pyntrei ia katei ka Police Out Post, ka la long shaba palat, namar ki sdang dang mynsngi Saitjain bad mynta ki la lah syndon ban pynieng Paia, ha ryngkat ka jingpahara kaba jur da ki Pulit Battalion jong ka sorkar Assam, iathuh u Bah A. Nongpoh.
Kum ka Synjuk ki Rangbah Shnong Tyrso Area, ki dap da ka jingsngewkhia bad pynpaw ruh ia ka jingpyrshah kaba jur halor kane ka jingwanbuh ktem Pulit da ka Assam ha kane ka jaka kaba dang hap hapoh u pud u sam ka Meghalaya, bynrap u Bah A. Nongpoh.
Namarkata, haba iadei bad kane ka jingwan buh jubor da ka Assam ia ka ktem pulit ha katei ka jaka, ka Synjuk ka kyntu ruh ia baroh ki Sengbhalang ki ba don ha Bri u Hynniewtrep, ba kin shimkhia lem na ka bynta ban pyrshah halor katei ka jingwanleh donbor da ka sorkar Assam. Ha kajuh ruh ka por ka Synjuk ka kyrpad ia u Nongmihkhmat ka Mawhati Constituency bad ia ki Bor District ka Ri Bhoi ban shimkhia lem na ka bynta ban wanrah ia ka shongsuk shongsain ha katei ka thain, u la bynrap.