Pynher shithi u MP ka Shillong, sha u Myntri Rangbahduh ka Ri ban dawa VC hapoh NEHU

Shillong: U Bah Vincent H Pala u ba dei u MP ka Shillong jong ka Lok Sabha u la phah shithi sha u Myntri Rangbah duh ka Ri, u Narendra Modi ban dawa thung kam noh da u wei u Vice Chancellor bathymmai hapoh North Eastern Hills University(NEHU) bad ban weng noh pat ia u Prof. SK Srivastava u ba long u Vice Chancellor mynta.

Ha ka shithi ba la phah sha u Myntri Rangbah duh ka Ri u Narendra Modi, u Bah Vincent H Pala u la ong ba dang shen u la phah shithi sha u Myntri ka pule puthi jong ka Sorkar Pdeng ha kaba u la dawa ban thungkam noh da uwei u Vice Chancellor ha katei ka jaka pule kaba pawnam jong ka jylla Meghalaya. Hynrei yn sa dang shim ia ka rai, u la ong bad da kaba u la ong shuh shuh, “Ia kaba mynta ka jinglong jingman jong katei ka jaka pule ka dang iai bteng ban dang hiar shapoh”.

U Vincent H Pala u la ong ka jingdon jong ka university ha ka kyrdan ka la nang hiar nang hiar katba dang mih ki snem.
“Ka kaiphod jong ka NACC ha u snem 2017 ka la batai ba ka jingdkoh ka rukom pyntreikam bad ka rukom pyniaid ka long kawei na ki daw kaba kongsan tam ba katei ka jaka pule ka hiar kyrdan,” la thoh ha ka shithi.
Kaba dang shu jia shen bad kaba la pynpeit mat bha ka long ka jinghap kyrdan jong katei ka University ha ka NIRF, 2020, ka NEHU ka don ha ka kyrdan kaba 49 kaba long ka jinghap kaba shiphew shah ban ianujor ha ki snem kiba la leit noh, la ong u Bah Vincent Pala.

“Ha ki san snem kiba la leit noh, ka rukom treikam jong katei ka jaka pule ka long kaba dkoh bha bad ka jinglehbha jong ka NEHU ruh ka dkoh kumjuh hi,” la ong shuh shuh u Bah Vincent.
Ka jingthylli ki post nonghikai ha ki tnad bapher bapher jong katei ka unibersiti ki dang iai thylli sah haduh kine ki sngi kiba mynta.
Namar ba dang iai thylli kitei ki post nonghikai, ki khynnah pule ki long kiwei kiba mad jingeh bha, la thoh ha katei ka shithi.
“Na ka bynta ka jingbha na ka bynta ki phew hajar ngut ki khynnah pule,” une u MP u la kyrpad ia u Myntri Rangbahduh ka Ri, u Narendra Modi ba un khmih bad peit bniah bha dalade bad ban thung noh da uwei u Vice Chancellor bathymmai kham kloi bad ba yn nym pynslem shuh.