Pynher shithi U bah Shylla sha U RS Laitkor, ia ka jingiatai nia

Shillong, 21 Naitung:
U bah H.S Shylla MLA barim ka Nongkrem bad u CEM barim ka KHADC u la thoh shithi sha u Rangbah Shnong ka Laitkor Rngi uba dei ruh u President ka Synjuk Ki Nongsynshar Shnong Khyrim Mylliem-Lum u bah Stenis L Pyngrope ba un shimti ia ka kam kum u nongpyniaid ia katei ka jingiatai nia hapdeng jong u bad ka seng HSPDP Nongkrem. Ha katei ka shithi u bah Shylla u la ong ba ka tarik,ka por,ka jaka bad kumno ban pyniaid ia ka jingiatai kan shong ha ka jingstad jong u Rangbah Shnong. U la thoh ba u kwah ban pynlong ia katei ka jingiatai hapoh ka taiew ba-ar jong u Nailar shuwa ban pynbna ia ka elekshon MDC shiteng samoi.
Shuh shuh ha ka shithi u bah Shylla u la pynkynmaw ba ka jing iatai kan long halor san tylli ki ishu kata : Ka jing pynneh pynsah ia la ki dustur ki riti khamtam eh halor ka iktiar u Rangbah Shnong bad Dorbar Shnong; Ka jingpynneh pynsah ia ka kheiñ-kur kheiñ-kha; Ka jingieng skhem halor ka Article 244 (2) ban nang pyn khlain bor ia ki Autonomous District Council bad ym ban phai sha  ka Article 371 A bad G kum ki Naga bad Mizo; Ban ym shah ia ka  jingwan tur jong ka MUDA sha ki jaka nongkyndong (Sixth Schedule Areas/ Tribal Areas ka Meghalaya bad Ban pynduh noh ia ka Compulsory Registration of Marriage Act, 2012.
U la pynkynmaw ruh ha ka shithi ba katei ka jingiatai nia ka dei kaba la pdiang hun ruh da ka seng HSPDP ia ka jingtyrwa jong u.