Shillong: Ka sorkar ka la pynbeit pali ia ki myntri sorkar ba kin pynher ia ka lama ka ri ha ka sngi Laitluid ka ban long ha ka 15 tarik mynta u bnai.
U Symbud Myntri rangbah u Bah Prestone Tynsong u la iathuh ba u Myntri rangbah ka jylla u Conrad K Sangma un pynher ha Shillong katba u Bah L Hek un leit ha Nongstoin.
U myntri sor u Bah Hamlet Dohling un pynher ha Nongpoh, u Bah Sniawbhlang Dhar un pynher ha Jowai bad u Bah Prestone un pynher ha Williamnagar, East Garo Hills.
U myntri tnad kam pohiing, u James K Sangma un pynher ha Ampati, u Bah Samlin Malngiang ha Resubelpara, u Bah Banteidor Lyngdoh ha Khliehriat, u Bah Metbah Lyngdoh ha Mairang.
U Bah Lakhmen Rymbui ha Amlarem, u Bah Comingone Ymbon ha Sohra.
U Symbud Lamphang u Timothy D Shira ha Dadenggre, u chairman ka State Planning Board chairman u Bah Lambor Malngiang ha Pynursla.
Ha Tura, Mawkyrwat bad Ranikor yn pynher lama ki ophisar ka sorkar namar ba ka don ka elekshon shiteng samoi ha South Tura bad ha Ranikor.