Pynher lama iong ka AASU, ha khmat u myntri ka sorkar Jylla

Ki dkhot jong ka All Assam Students’ Union (AASU) mynta ka sngi, ki la pynher lama iong ha khmat U Atul Bora, myntri kam rep ka sorkar Assam, ha ka madan Lakhi Puja, kaba don ha Jagduar jong ka Jorhat.

U Bora, uba dei U President ka AGP, ula leit sha katei ka jaka, na bynta ka jingialang parti.

Ki dkhot jong ka AASU, kiba na Teok, Lahing, Lahdoigarh ki la ia pyrta paidbah bad pynher sa ki lama iong ha ka lynti iaid jong U Bora, kum ka dak jong ka jingsngew pyrshah ia ka ain Citizenship Amendment Act (CAA). La iathuh ba ki pulit, ki la beh ia ki dkhot jong ka AASU.

Katei ka jingtur jong ki dkhot ka AASU, ka la pynmih ruh ia ka jing ia pyni bor ba shipor, ha kaba ki dkhot ka AGP, ki la kawang da ki maw it ia ki dkhot jong ka AASU, hynrei U Chakra Baruah, President ka AGP ha Teok, ula kyntait ba ki dkhot jong ka AGP, ki la kawang maw sha ki dkhot jong ka AASU.