New Delhi: Ka sorkar India, ka la khang ia ka jingtrei kam ki internet ha ki shiphew tylli ki district ha Assam, na ka bynta 24 kynta, kaba sdang naduh ka por 7baje mynta ka miet bad ka daw, ka long namar ba ka jing iakhih pyrshah CAB, ka la nang jur ha ki bynta bapher jong ka Assam, ong ka khubor. Ka Guwahati, hap satia ha katei ka jingkhang internet.
Ha Tripura ruh ka jingkhang internet, ka la trei kam naduh hynnin ka sngi, ha ka por 2baje. La iathuh ba ki shipai ruh ki la nang poi ha ki bynta bapher jong ka thain shatei lam mihngi bad ha Assam, la pynap lypa, da ar kynhun ki shipai, katba ha Tripura, la pynpahara da ki ar kynhun ki shipai, ha kaba ka jing kulmar ka la nang jur ha katei ka Jylla, ong ka khubor.
Kat haduh mynta, la iathuh ba ki don 5, 000ngut ki shipai, kiba la nang phah sha ki jylla bapher ka thain shatei lam mihngi, na ka bynta ban teh lakam ia ka suk ka sain, ong shuh ka khubor.
La iathuh ba mynta, ki samla ki la ia lum lymbung ha khmat ka Secreteriat jong ka Assam, ha kaba ka la don ka jing ia pyni bor bad ki pulit ha katei ka jaka bad la iathuh ba U Sarbananda Sonowal, myntri rangbah ka Jylla, ula shah khang lynti ialade ha kad liengsuin ha Guwahati, namar ba ka jing ia khih ka bteng bad ka jur bha ha shi lynter ka lynti ban leit sha ka sor bah Guwahati.
Phi don ban ong eiei?