Sriharikota (Andhra Pradesh): Ka India, ka la pynher mynta ka sngi, ia u Chandrayaan – 2, uba leit lang bad u roket ba khlain bor, lane u GSLV-MkIII-M1, na ka bynta ban leit wad bniah ia ka jinglong jingman ha u bnai, ha kaba ka kali kaba la shna kyrpang, kan iaid bad kan wad bniah ia ki jingtip kiba don ha u bnai.
U Chandrayaan-2 – lane u Moon Chariot 2, u her na ka kad haw haw ha ka por 2.43 baje nohsngi, kaba don ha rud um jong ka Andhra Pradesh.
Ka jing pynher ia U Chandrayaan – 2, ka long hadien shi taiew ba la pynsangeh noh, namar ba ka don ka jingthut jong ki tiar kiba don jingiadei bad ka lain umphniang jong katei ka mashin.
Katei ka tiar haw haw, kan poi ha ka lunar south pole ha U Nailur bad hangt kan pyniaid ia ki kali, ki ban wad jingtip shaphang ka jingdon um bad kiwei ki kynja ba im, kiba don ha u bnai. Ka India, ka don jingthmu ban phah ia u briew, u ban leit sha u bnai ha u snem 2022.
U Narendra Modi, myntri rangbahduh, u pynpaw ia ka jing kyrmen ba katei ka jingjop, kan plie na ka bynta ban nang pynkhlain ia ka jinglum jingtip shaphang u bnai. Katei ka liengsuin bneng, kan iaid lyngba ka lunar suface, na ka bynta 14 sngi, kumba ka iaid ka pyrthei bad nangta kan iaid 47 sngi, ha shwa ban hiar ha u bnai. Katei ka lieng bneng, ka dei kaba khia 2.4-tonne (5,300-pound) bad kan iaid sawdong jong u bnai, na ka bynta shisnem kynthih. La iathuh ba la pynlut $140 million na bynta katei ka jingleit bad ka dei ka dor kaba duna shibun, haba ia khein bad ka jinglut jong kiwei pat ki ri, na bynta katei kajuh ka jingthmu.
Phi don ban ong eiei?