Pynher biang ia ka lama ISIS, ha ki them Kashmir

Srinagar, 17 Risaw:
Ka la don biang ka jingpynher ia ka lama ki ehrang ISIS, mynta ka sngi, hadien ka jing duwai sngi thohdieng bad la iathuh ba kitei ki samla, kiba la tap jain iong ialade, ki rah ia katei ka lama ki ehrang ISIS, ha ki bynta jong ka Jamia Masjid.
Ki pulit, ki iathuh ba kim shym la tip satia ia katei ka jingjia, kaba jia ha ki bynta jong katei ka them jong ka Jammu and Kashmir mynta ka sngi.
Kane ka jing pynher lama mynta ka sngi, ka dei ka sien kaba saw, kaba la pynlong, ha ki jingiakhih bapher, kiba la pynlong ha Kashmir, ha kine ki lai bnai ba ladep.
Na ka liang ki shipai, ki shim ba ka jingpynher lama jong ki ISIS ha Kashmir, ka dei ka phang, kaba ki sngewkhia bha bad kaba donkam ban don ka jingpynleit jingmut kaba khraw shibun eh.
Kiwei ki lad khubor, ki iathuh ba ki don mynta ki nongniah liengsuin jong ka Iraq, kiba la leit ban pyniasoh ialade bad ki ehrang ISIS ha Syria, kiba la hikai ia kitei ki ehrang, ba kin pynher ia ki liengsuin iapom bad la iathuh ba katei ka dei ka jingjia, ha ka sien kaba nyngkong, ba ki ehrang, kin ioh ban pyniaid ia ki liengsuin.
La iathuh ba katei ka kynhun jong ki ehrang, ka pynher ia ki liengsuin ha ki bynta ba ka la ioh kurup ha Syria bad ha Iraq bad ha ki jaka, kiba hap ha ka kad liengsuin, jong ka al-Jarrah, kaba don sha mihngi jong ka Aleppo.
Kitei ki nongniah ia kitei ki liengsuin jong ka Iraq, la iathuh ba ki dei kiba triem bha, namar ki dei kiba la hikai, da ki nongniah liengsuin kiba na America.