Pyneh U Mukul ban pynhap shuki ia U Bah HDR & Julius

Shillong, 09 Rymphang:
U Myntri Rangbah ka jylla u Dr Mukul Sangma u la pyneh beit ba um nym pynhap shuki ia u myntri tnad kam pohiing bad ia u chairman ka KHADI Board u Bah Julius K Dorphang watla ki seng bhalang ki la dawa ban pynhiar shuki ia u Bah Julius namar u la shah kynnoh donkti ha ka kam batbor kynthei bad u la don mynta hapoh phatok katba la jia ha Marvelenn Inn ba dei trai u khun jong u Bah HDR Lyngdoh.
“Ngim dei ban kyrkieh, ngi don ka tnad pulit kaba la pynkhamti da ka ain ban tohkit, ngin hap ia ka kaiphod”, la ong u Dr Mukul.
U Dr Mukul u la ong ba un nym weng ia ki na ka shuki haduh ban ioh ia ka rai ne ka kaiphod kaba shai halor kane. “Ngi dang ap ia ka kaiphod na ki pulit, ngam pat don daw ban weng ia ki”, la bynrap u Dr Mukul.
Lah ban kdew ba u Bah Julius u la shah kem bad shah tian bishar halor ka jingkynnoh lei beijot ia kawei ka khynnah 14 snem ha hotel jong u khun jong u Bah HDR Lyngdoh ha Marvelenne Inn, ha Rilbong bad halor kane, ki sengbhalang, kynthup ka CSWO bad kaTUR ki la dawa ba u Myntri Rangbah u dei ban weng noh ia u Bah HDR Lyngdoh na ka tnad kam pohiing khnang ban ailad ia ka jingtohkit jong ki pulit kaba laitluid.
Ka jingshah kynnoh leh beijot ia ka khynnah da u MLA ka Mawhati u Bah Julius Dorphang ka la khih hadien ba ka chairperson ka State Commission for Child Right, ka Kong Meena Kharkongor ka la ujor ejahar pyrshah ia u bad ia kiwei kiba donkti ha kane ka kam. Haduh mynta ki pulit ki la kem haduh 17 ngut ki briew ba donkti ha kane ka kam leh beijot ia kane ka khynnah.