Pyneh rngiew ka Seng Khasi ia ka Ing Seng ha Mawkhar

Shillong, 10 Jymmang:
Mynta ka sngi ka Seng Khasi (Seng Kmie) ka la lah ha kaban pyndep ia ka ‘pyneh rngiew’ ka jong ka ha iing seng ha Mawkhar Shillong.
Ia kane ka kam kaba hap ban da kiew ha khmat u longbah, ryngkat ka khad syiar, halor u prah u pdung la shimti ia ka da ka kynhun u Tymmen u San jong ka Seng Khasi hapoh ka jingialam ka jong u Rgh. Skor Jala.
Ka jingpyneh rngiew ka long kum shi bynta ban ia pan pat na U Blei ba un nang lah ban ai ia ka buit ka bor ia baroh ki nongialam ki tnat ka Seng Khasi  Sein Raij  ba kin lah ha kaban ialam bad ban btin lynti iala ki para ba dang ia bat bad snoh iala ka jong ka niam tynrai niam tre, ba kin nang ioh na U Blei ia ka buit ka bor, ryngkat ka ka jingshemphang ban pynneh bad pynsah iala ka jong ka niam ka rukom kumba la seng la dang naduh u mynbarim.
Hadien ba la dep ka nguh ka dem, la ioh pat ia ka jingpynithuh ia ki dkhot kiba thymmai na ki tnat Seng Khasi ba kynthup ia ki nongialam ka tnat Seng Khasi Sohra Circle bad kumjuh ia ka tnat Seng Khasi West Khasi Hills, kiba la wan ban ia don lang ha kane ka sngi. Hadien ba la dep ka nguh ka dem, la ioh pat ia ka kyntien ai khublei na u President ba shipor u Rgh P.S Dkhar, uba la ai khublei ia ka kynhun u Tymmen u San, kiba la wan ban pyndep ia kane ka lehniam ka leh rukom.