Pynduna ka Mock Drill, ong u DC

Shillong, 13 Nailar:
U Deputy Commissioner ka East Khasi Hills u Bah Peter S Dkhar u sngew ba ka jingpyni nuksa ne mock drill dei ban pynduna namar ba lada long khah khah kan wanrah pynban ia ka jingsngewthut ia ki paid bah.
”Ia ka Mock drill dei ban leh tangba kam dei ban long man ka por”, la ong u DC haba iakren hynne ka sngi bad ki lad pathai khubor.
U la ong ba ka jingpynlong ia ka mock drill  ka long ka jingmyntoi ia ki paidbah bad ia ki briew kiba pynlong ia ka mock drill namar ba kan ai ia ki kum ka jinghikai ban leh eiei haba iakynduh ha ka por ba jia kynsan.
”Ngim lah ban ai jingtip lypa ia ki briew shwa ban leh ia a mock drill. Ha ka mock drill,  namar ba kiei kiei ki dei ban long kumba ka dei shisha, bad ka dei ban ioh ruh ia ka jingsngew jong ki paidbah kumba ki iohi lada don shisha kum kata ka jingjia hynrei lada iathuh lypa ki paidbah ki la tip bad kam don jingmut shuh ban leh mock drill”, la ong u Deputy Commissioner.
U la ong ba ki briew kiba leh ia ka mock drill kin leh bha ha ka rukom kaba dei bad kaba biang.
Ha kine ki sngi, la don ka jingbitar na ki paidbah ia ka jingleh mock dril jong ki pulit ha thain Laitumkhrah bad ha Shillong Civil Hospital.