Pynduh syndon ia ka CMJ University, ong U Lat

Sei tuh ka CMJ ia ka pisa ba T.210lak jong ka Endowment Fund
Shillong, 12 Jylliew:
Ha ka sien ba nyngkong, ha kaba U Lat, ula pynmih ia ka kyrwoh jongu, kaba ula soi hi bad pynmih sha ki kotkhubor, U RS Mooshahary, ula shim ia ka rai ba dei ban pynduh pyndam noh syndon ia ka Chandra Mohan Jha University, lane kaba la ju tip paidbah ka CMJ University.
U Mooshahary, uba dei ruh ialade U Visitor jong ka University, ula kren shai, ba kat kum ka kyndon kaba 48 jong katei ka ain, kaba la shna ha u snem 2009, ka sorkar Jylla, ka don ia ka lad ban pynduh pyndam no ia katei ka University shi syndon.
Ha ka rai kaba la pynmih mynta ka sngi, da U lat ka Jylla, kaba pyni ba U Lat, ula rai rangbah pyrshah ia ka University bad kaba u khlem buhrieh satia ia ka rai tang halade, hynrei ula sei madan ha ki kotkhubor, U Mooshahary, u kynnoh ruh ba katei ka University, ka la leh shukor, da kaba ka leit sei tuh ia ka pisa kaba T.210lak, kaba dei ka pisa, ban siew da ka University sa ka sorkar Jylla, kaba la tip kum ka Endowmen Fund, ha kaba ka la sei biang, tang hadien khyndiat sngi ba ka la leit siew.
Ka jingpynshai jong U Lat, ka long halor ka jingthoh kaba ula ioh na u nongai jingmut jong ka CMJ University, halor ki kam ain, U SP Sharma, kaba ula ioh pdiang ha ka 24tarik Jymmang 2013. La iathuh da U Lat, ba ka CMJ, ka dang leit sha kashari, na ka bynta ban pynbiang ia ki jingdonkam ba la bthah da U Lat, haduh ka 10tarik Jylliew 2013, kaba long ka rai kaba la dier por bha, wat la ki la ioh ia ka hukum na U Lat, ha ka 30tarik Iaiong 2013-06-12, ha kaba la ai por, ba kin pynbiang ia baroh ki jingbthah jong U Lat, hapoh ka 21tarik Jymmang 2013.
Katei ka shithi jong U Lat, ka kdew, ba ka jingai kyrdan Ph.D jong ka CMJ ia ki samla pule, kaba long haduh 434ngut ha ki sne 2012-2013, ka long kaba beain bad la kren pyrshah ruh halor ka jingjied ia U CM Jha, kum U Chancellor jong ka University, ha kaba um shym la ioh ia ka jingmynjur na U Visitor, uba dei u Lat ka Jylla.