Pynduh pyndam noh ka KHADC ia ka MoU bad ka UCIL

Shillong, 22 Rymphang:
Ka Dorbar jong ka KHADC mynta ka sngi ka la pynduh pyndam noh ia ka Memorandum of Understanding (MoU) kaba la soi ha ka 12 tarik u Kyllalyngkot, 2016 hapdeng ka KHADC bad ka UCIL, ka la pynduh pyndam ruh ia ka No Objection Certificate (NOC) kaba la soi ha ka 14 tarik u rymphang, 2007 na ka bynta ka jingtyrwa ban khlong Uranium ha Kylleng Pyndengsohiong Mawthabah. Ka Dorbar ka la rai ruh ba ka Executive Committee kan thaw ia ka kynhun tohkit ba laitluid ban tohkit ia ka jingshna surok na Wahkaji sha Mawthabah kaba la peit bad khmih da ka District Council. Ka dorbar ka la rai ruh ba nangne sha khmat kano kano ka Executive Committee kan ym lah ban ia kren eiei shaphang ka kam Uranium bad lada donkam ban ia kren hap ban wanrah hapoh ing dorbar.
Ha kaba iadei pat bad ka ripod tohkit ba la rah ha ing dorbar mynta ka sngi halor ka jingrung ka pisa ba la iohlum na ka Professional Tax sha ka bank account ki riew shimet kaba ka ripod ka la kynnoh ba ka dei ka jingpyndonkam bakla jong u Secretary barim ka KHADC u ba Welljune Syiemlieh ka ing Dorbar kam shym la hun bad ka la rai ban bishar bniah ia katei ka kam da ka komiti jong ka ing dorbar kaba la thaw mynta ka sngi ha kaba u bah Manstudy Nongrem un khlieh kum u Chairman, bah M.Kharkrang Jnt. Secretary Legislative kum u Secretary, kong Teilinia Thangkhiew, Teinwell Dkhar bad bah Adelbert Nongrum kin dei ki dkhot.