Shillong: Myn hynnin ka sngi, lyngba ka mukotduma, (WP(c)No. 161 of 2019, U Billu Singh, uba na Harijan Colony, ula leit rah ha kashari jong ka Meghalaya high Court, ha kaba u dawa ba dei ban pynduh noh ia ka soskular, kaba la iasoi hapdeng ka Hima Mylliem bad ka Shillong Municipal Board, kaba la ia soi ha ki snem 50.
Katei ka dei ka soskular, kaba la mynjur, na ka bynta ban ai jaka sah ia ki kharmetor, kiba trei hapoh ka Shillong Municipal Board.
Ka jing dawa jong U Billu Singh, ka long ban pyrshah halor ka jing ujor na U bah VGK Kynta, uba ia said na bynta ka Khasi District Council, ba katei ka mukotduma, ka dei kaba don jingduna ha ka rukom pynkhreh bad kumta ka kashari, ka la pynkut noh ia katei ka mukotduma, wat la kam khang pat ban ai da ka jing ujor ba thymmai, lada don kiba sngew iahap ban leh kumta.
La sngewthuh ba ka jingkwah jong U Billu Singh, ka long ba katei ka jing iateh, la dei ban pynduh noh, namar ba ki kharmetor, ki la don lypa ha katei ka jaka, naduh ba wan rah ka sorkar phareng bad kumta ka jing iateh hapdeng ka Hima Mylliem bad ka Municipal kam dei ban trei kam satia.
La sngewthuh ba katei ka jingthmu jong ka mukotduma, ka long ba lada pyntrei kam ia katei ka jing iateh, ka long ba lada ki kharmetor, ki mih noh na katei ka jaka, kumta, ka jaka, kan hap ban leit phai biang noh sha ki trai, kaba mut sha ka hima Mylliem.
Kham mynshwa, ha U Jylliew 2018, U Pa’iem Ricky, U Acting Syiem jong ka Hima Mylliem, u iathuh ba ka Hima ka la wad bniah ia ki kot ki sla kiba ia dei bad katei ka jaka hangtei bad la lap ba ka don kawei ka jingiasoi soskular hapdeng ka Hima Mylliem bad ka Municipal ha u snem 1954 bad katkum katei ka soskular u la ong ba ka la ia soi ba ka hima Mylliem kan ai ia ka jaka kaba don ha Them Iew Mawlong na ka bynta ban shna jaka sah ia ki khar metor kiba trei hapoh ka tnad Municipal bad ha kiwei pat ki tnad sorkar.
Hynrei ia katei ka soskular u la ong ba la ia soi ha ki ar bynta, kawei ka dei ban ai ia ka Municipal ban shna jaka sah ia ki khar Metor ha ka jaka kaba heh 10 hajar Sq.ft bad kawei pat ban shna ia ka iew ia die ia thied (Complex) jong ka Municipal ha ka jingheh kaba 21 hajar Sq.ft. Hynrei katkum katei ka jingiasoi kular u la ong ba la kren shai ba lada ka Municipal kam pyndonkam ka jaka kan leit biang sha ka Hima Mylliem bad ka hima Mylliem kan shna pynheh ia ka ïewduh kaba la khapngiah palat.
Shuh shuh u Acting Syiem u la ong ba ki la don 218 ngut ki riew shimet kiba la pan pata ha them Metor hynrei ka hima Mylliem kam ai ia ki bad u la iathuh ba ka hima Mylliem kam ju lum khajna na ki khar Metor kiba sah hangtei ha ka jaka kaba heh 1 akar. Halor ka jingkam ki ar Kur ia katei ka jaka, u Syiem u la ong ba katkum katei ka jingiasoi kular ha u snem 1954 kam shym la pyni satia ia ka jinglong trai jong ki kur ia katei ka jaka, hynrei ka pyni beit ba ka Hima Mylliem ka dei ka trai jaka bad kim shym la don bynta eiei ha ka jingiasoi soskular.
Phi don ban ong eiei?