Pynduh ia ki jingsngew ia kiba pang AIDS, ong ka myntri

Shillong 28 Nailur:
Ka Anupriya Patel ka myntri khynnah ka koit ka khiah ka sorkar pdeng ka la ong ba dei ban weng noh ia ka jingsngew khohnioh ne khein bein ia ki briew ba ioh ia ka jingpang AIDS ha ka imlang sahlang.
Haba kren lyngkot mynta ka sngi ha ka jingialang pynkup burom ba pynlong da ka Meghalaya AIDS Control Society (MACS) ha ophis ka Directorate ka Health Services, (Research), Shillong ka la ong ba donkam ban trei lyngba ka jingiatreilang baroh ban ialeh pyrshah ia kane ka jingpang.
Ka la kyntu ba ki sengbhalang bad ki tnad sorkar bapher bapher ki dei ban iatreilang ban sam ia ka jingtip kumno ban wanrah ia ka jinglong jingman bad ka imlang sahlang kaba myntoi khamtam ia ki briew ba don kum kane ka jingpang.
Ka la ong ruh ba ki lad pathai khubor ki don ia ka bynta ba kongsan ban pynbna ban pynsaphriang shaphang kumno ban lait na kane ka jingpang bad ban pynlait ia ki paidbah na ka jingsngewthuh bakla.
Ka myntri ka la iakren ruh bad ki briew kiba ioh ia kane ka trei ia kane ka kam bad ki nongjop ha ka Meghalaya Icon V – ka ‘Dymbur’.
Shwa ia kane, ka la pynlong ruh ia ka jingjnoh ia ka ICTC, ART, CST bad ka Suraksha Clinic ha Civil Hospital, Shillong bad ruh ia ka Regional Blood Bank ha Pasteur Institute, Shillong, ha kaba ka la pynpaw ia ka jingsngew kmen ia ka jinglah ka sorkar ban pynbiang ia ki jingdonkam wat hapdeng ka jingduna.
Ha kane ka prokram la don lang u Y Tsering u Additional Chief Secretary , u Dr. R Wankhar u director DHS (MI), Dr D Lyngdoh, DHS (R), bad kiwei de.