Shillong:Ka Khasi Students’ Union mynhynnin ka sngi palei, ka 03 Tarik u Iaiong 2025, ka la ioh ban iakynduh ia ka komiti ba la thaw da ka Sorkar jylla ban pynthymmai ne pynbha ia ka Meghalaya Public Service Commission (MPSC).
Ia kane ka komiti la lamkhmat da u Bah F. R Kharkongor, IAS kum u Chairman ha jingdon ryngkat u Cyril V.D. Diengdoh IAS bad u Professor David Syiemlieh kum ki dkhot bad kiwei kiwei.
Ha ka jingiakren bad ki lad pathai khubor, u Samla Reuben Najiar u ba dei u Assistant General Secretary ka seng u Ia ong, ba ia kane ka komiti la thaw hadien ba ka Seng ka la buh ia 20 tylli ki mat jingdawa ha khmat ka Sorkar ban pynthymmai ia ka rukom treikam hapoh ka MPSC.
U la ong, ba kane ka komiti ka ladep buh ruh ia ka jingkyrpad sha ki paidbah ban ai jingmut (suggestions) halor ka jingpynthymmai ia ka MPSC kaba la kut ha u bnai Rymphang.
Ha kane ka sngi ka Seng, nalor ki 20 tylli ki mat jingdawa ba ka la dep buh, ka la pynsngew ruh halor ka jingmih ki recruitment boards ha kine ki sngi ki bym shim don kino kino ki kyndon ain halor ka thungkam thungjam bad ki rai ba ka mih na kane ka komiti (recommendations), dei ban phah ruh sha kine ki recruitment boards bad ka DSC, ba ka thungkam thungjam kan long kaba khuid, khnang ba kan nym long ka ba dkoh, la ong u samla Reuben.
Shuh u la ong, ba ki mat jingdawa ba ka seng ka la buh ka long, ba dei ban pynmih ia ki mark jong ki nongiakhun ha ka exam bad ban pynduh noh ruh ia ka personal interview ha ki group -B, Group -C, bad group-D, namar ka jingbamsap bad ka jingiaid bakla ka dei beit ha ka personal interview.
Ka Seng ka la ai jingmut ruh ban pynduna ia ka pisa eksamin bad ban buh kyndon ruh ban ailad ia ki briew kiba duna ha ki dkhot met ba kin lah ban apply ne thep bad ban ialeh ia ki eksam thungkam katkum ka ain.
Phi don ban ong eiei?