Pyndonkam ka GNLA, da ki nongsyntiat ban rahbor ia ki heh spah

Shillong, 25 Nailur:
Ki pulit ka jylla mynta ka sngi ki la kam ba ka GNLA ka pynrung dkhot ia ki briew kiba dei na ka jaitbynriew rit paid jong ka jylla Assam ban long kum ki nongpeit ngor ia ka iaid ka ieng ka kamai ka kajih jong ki heh spah bad ki nongkhaii bad kumno ban ioh lad ban rahbor ia ki. U SP ka North Garo hills u Ramesh Singh u la pyllait paidbah ia ka dur jong uwei na ki nongshet jingshet uba la phet tuh na ka tnad pulit uba la tip kyrteng kum u Ali uba ka GNLA ka la pynrung dkhot ba un long u nongai jingtip ia ka iaid ka ieng bad ka kamai ka kajih ki nongkhaii heh spah bad kumno ban ioh rahbor ia ki.
U Singh u la ong ba ki don bun ki nongtrei jong ka GNLA na ki jaitbynriew rit paid ka Assam kiba ju ai khubor ia ka GNLA kumno ban ioh rahbor ia ki nongkhaii heh spah khamtam na Mancachar bad Goalpara kiba wan ban khaii ha ri Lum Garo. U la ong ba kitei ki nongpyntip ka GNLA ki pnah thylliej bha ban kren haduh ba ki nongkhaii ki ia thuh lut ha ki ia ka iaid ka ieng jong ki bad kaba kut hi ka dei ka jingshah rahbor jong ki. U la pyntip ruh ba ka jingioh nong kitei ki nongpyntip ka long ba hadien ba ki bahaing hasem jong kito kiba la shah rahbor ki siew ia ka pisa ba la dawa, ki ju ioh ruh ia ka bhah jong ki na ka GNLA.
U Inspector General of Police (Operations), u GHP Raju u la pyntip ba ka daw ka jing kiew ka jingshah rahbor ki nongkhaii heh spah ha ri Lum Garo ka dei na ka daw ba kiba haing hasem jong kito kiba la shah rahbor kim ju pyntip sha ki pulit. U Raju, u la pyntip ruh ba u Ali uba dei u nongshet jingshet ki pulit u la phet tuh na ka kam jong u bad u la rong kawei ka suloi SLR na ktem pulit na Thapa Darengchi, North Garo Hills dang ha une u snem ba la dep, hynrei kham hadien ki pulit ki la ioh jingtip ba la leit ia soh bad ka GNLA.
U Raju u la pyntip ba dang shen ki la don haduh 3 ngut ki heh spah kiba la shah rahbor na Goalpara bad haduh mynta ki dang don ha kti ka GNLA “Kiba haing hasem jong ki, kim treh ban ia kren bad ki pulit bad kim treh ruh ban ujor halor katei ka jingjia” u la ong. Katkum ka jingkam ki pulit ki la ong ba u Ali u dei uba ia trei ha syndah jong u Commander ka GNLA u Philiport. Katkum ka jingong ki pulit ki la iathuh ba ha ki 6 bnai ba la dep palat 20 ngut ki briew na ka thaiñ Mancachar kiba la shah rahbor bad ki don ruh kiba la shah pyniap. Ha u bnai jylliew u Hafizur Rahman, uba na South Salmara na Assam u la shah kem ha South West Garo hills.