“Pyndonkam hok jinglong samla”

Shillong:Ka jinglong samla ka dei ka por kaba kongsan tam ha ka jingim u briew ban sain dur ia ka lawei ha ka jingim ban suk lashai lashi shi sngi, la ong u rangbah R Sungoh u nongkitkam ka Seng Khihlang.
Haba kren hynnin ha ka seminar halor ka phang ‘ka lawei ki samla bad ka niam’ u Rangbah Sungoh u la ong ba ka por jinglong samla jong u briew ne ka briew ka dei hapdeng naduh ba u dang 20 haduh 40 snem bad ha kine ki por ba dei ban saindur bha ia la kawei.

Ha ka jingiakyn duh lang jong ki samla seng Khasi Riwar Mihngi tnat Shillong kiba sah ha Shillong hynne ka sngi, u rangbah Sungoh u la ong “lada pulom kine ki 20 snem, ka bor ka la sepei”. U Rangbah Sungoh u la kyntu ia ki samla ban pynleit jingmut bha ha ka jingpule jongki bad ruh ha ka jingkhein. “Kano kano ka jaitbynriew kaba duna ia ka jingkhein, ka mut ba ka duna ka jingpynleit jingmut”, la ong u Rangbah Sungoh bad kyntu ba ki samla ki dei ban pynleit jingmut bha ha ka pule dangle khnang ba kin long kiba jop.

Shwa ia kane, la ioh ruh ia ka jingkren na u Bah Janai Nongkynrih uba ong ba ki samla seng Khasi ki dei ban kynmaw ia ka burom ka akor naduh iing ban nym leh thala hynrei ban da thew ia ka ktien ka thylliej kaba ki kren ruh.
U la ong ba ha ka jingim jong u briew, don lai tylli ki khnam ba donkam, uwei u khnam uba dei ban iada ialade, uwei pat ban iada ia ka ing ka sem bad uba lai pat uban iada ia ka ri bad ka jaitbynriew na ki nongshun.
U la ong ba ka jaitbynriew ka la nang hiar ha kine ki sngi namar ba wat ha ka liang ka put ka tem ruh la nang hiar, bad namarkata, ka donkam ia ka jingpynjanai ia kane ka kam kum ki briew jong ka seng namar lada klet ia la kijong yn sa kynduh jingeh hadien.

Katba u Bah M marbaniang u la ong ba ki samla ki dei ban pyrkhat ruh na ka bynta ka lawei ha ka liang ka synshar ka khadar ban pynleit jingmut ban minit ban long heh long hain. U la ong ha kine ki sngi kiba longheh longhain ki dei kiba nabar suda bad kane ka pynsting ban leh ban pyrkhat ia ka jaitbynriew namar ba kim dei trai.
Ha kane ka sngi, ia ka jingialang la pyniaid da u samla Promeeyo Khongjirem, bad la ioh ruh ia ka jingpynskhem ia ki nongkitkam ka tnad seng. Hadien ba la pynlong ia ka seminar, ka la don pat ka jingiakynduh ka jingkren na ki rangbah ha ka sneng ka kraw ia ki khun samla ka seng Khasi Riwar Mihngi.