Pyndonkam bakla U CEM ka JHADC, ia ka pisa kaba T.2.5klur, ong lai ngut ki MDC ka BJP

Jowai: Ki lai ngut ki MDC jong ka seng BJP jong ka JHADC kiba kynthup ia u ma Lakhon Biam ma Krison Langstang bad u ma Dawan Lyngdoh, ki la lap ia ka jingpyndonkam bakla ia ka pisa jong ka Council haduh T. 2,50,00,000/- tyngka (ar klur san phew lak tyngka) da u CEM ka JHADC Jowai.

“Ngi kwah ban pynkynmaw kumba la paw ha ki kot khubor ha ka 29th Rymphang 2020 u CEM T. Chiwat u la pyndonkam bakla haduh Rs. 4,00,00,000/- tyngka (saw klur tyngka). Lada u CEM um pyndonkam bakla kumne ia ka pisa ka council na ka por sha ka por, kam long kaba eh ia ka council ban siew ia ka tulop jong ka JHADC Jowai” ong ka kyrwoh na ki MDC.

Katei ka kyrwoh ka ong shuh shuh ba kane ka jing pyndonkam bakla ia ka pisa, ka la buh ia ka Council ha ka jingeh kaba khraw namar kane ka jingpyndonkam bakla ka iai bteng man ka por bad la ong ba lada ka Council kam lah shuh ban siew tulop ia ki nongtrei jong ka, kan duh kan dam noh ha kawei ka sngi.

Kane ka jingpyndonkam bakla u CEM ia ka pisa ka Council na ka por sha ka por ka la ktah jur ia ka jingtreikam ka Council, kumta ngi dawa na u CEM ka JHADC ban pynphai ia kane ka pisa khnang ban ioh siew tulop ia ki nongtrei bad kiwei kiwei ki jingdonkam ka Council, ong shuh ka kyrwoh.