Pyndonkam bakla ki nongialam HSPDP ia ka MLA Scheme ha Nongstoin

Shillong, 20 Rymphang:
Ka seng WYWC ka la kynnoh ba ki nongialam ka seng HSPDP ki la shim kabu ia ki briew jong ka thain nongstoin kiba dang bun kiba duna ha ka liang ka jingnang jingstad ha kaba ki la pyndonkam bakla ia ki MLA Scheme jong ka Nongstoin bad Rambrai Konstitwensi.
Katkum ka kyrwoh ba la phah da u bah L. Marngar President WYWC u la ong ba ka seng ka la lap lyngba ka RTI ba ha ka 4 tarik u jylliew 2013 ia ka jingbym pyntreikam ia ki MLA scheme khamtam ha ka SRWP bad ISYDP ha kaitei ki konstitwensi. La ong ba ki la don shibun ki Madan, ki Community Hall, ki Youth Club, ki Jiengkieng, bad ki Surok ki ba don tang ka kyrteng bad khlem da lap haei haei ruh. “Lada baroh nakine ki schemes la pyndonkam hok, mynta kane ka thain jong ngi kan jin da la kylla da kumwei” ong ka kyrwoh na u bah L.Marngar.
Ka seng ka la kyntu ia ki paidbah ba kin long kiba husiar na kiba kum kitei ki nongialam kiba pyrta ieid jaitbynriew phewse ki die tad ia ka jaitbynriew da ki kam bamsap. Ka kyrwoh ka long ba ka seng kan ym shongthait ne shong kli kti hynrei kan iai buddien shuh shuh ban pynsaja ia ki briew kiba donkti ban pyndonkam bakla ia ka pisa paidbah.