Nongpoh, 30 K’lyngkot: San ngut ki kyrtong ka Congress bad 2 ngut ki kyrtong ka NPP, mynta ka sngi, ki la pyndep ha ka ban leit thep kyrteng ha ki Returning Officer kiba don ha ophis u Deputy Commissioner ka Ri Bhoi, kata shwa ba kin pynthikna ialade ba kin long kum kita ki kyrtong kiba pura ban aireng ha kane ka Ilekshon sha Khasi Hills Autonomous District Council (KHADC).
Na ki kyrtong ka Congress kiba la pyndep ia ka jingleit ban thep kyrteng, ki kynthup ia u Bah Victor Ranee u ban iakhun na Jirang Constituency, u Bah Lawrence Nongrum na Nongpoh, u Bah Rocky A. Marwein na Umsning, u Bah Dominic Mynsong na Mawhati bad u Bah M.D Syiem, u ban sa iakhun na Umroi Constituency.
Katba ki kyrtong ka NPP, kiba la leit ban thep kyrteng mynta ka sngi, ki kynthup ia u Bah Joplin Sten, kyrtong ka NPP na Mawhati Constituency bad u Bah Rangkynsai Kharbuki, kyrtong na Umroi Constituency.
Ha ka por ba kitei ki arngut ki kyrtong ka NPP ki leit ban thep kyrteng, la iohi ba la leit ban synran ia ki da ki MLA lem bad ki nongkyrshan ka NPP, ha kaba ia u Bah Joplin Sten, la leit ban synran da u Bah Charles Marngar, MLA Mawhati, katba ia u Rangkynsai Kharbuki, la leit ban synran da u Damanbait Lamare, MLA Mawhati ha ryngkat ka jingdon ki nongkyrshan ka Party.
Ka la long kumjuh ruh ia ki kyrtong ka Congress, ha kaba ki la leit ban thep kyrteng, ha ryngkat ka jingdon ki nongialam ka Congress ha Ri Bhoi, ha ryngkat ka jingdon ki nongialam ka Ri Bhoi District Congress Committee lem bad kiwei.
Phi don ban ong eiei?