Pyndep ka Hima Mylliem ia ka lehniam ha Iewduh

Shillong, 09 Naiwieng:
Ka Hima Mylliem mynta ka sngi ka la pyndep ia ka jingleh niam ba shisien shi snem hapoh Iewduh. Ia ka jingleh niam la pyndep da u Lyngdoh jong ka Hima ha kaba ia jingknia jingkhriam kala iaid beit iaid ryntih.
Ha kane ka sngi la khang ia ka iew baroh shisngi namar kane ka iew kam dei tang ka iew kumba long lem kiwei ki iew hynrei ka dei ka iew niam iew kyntang kaba ka hima ka da pynlong ia ka nguh dem blei da ka niam ka rukom kaba kila bat na duh ki por u myn ba rim ba jah bad ka dang iaid beteng haduh kine ki sngi.
Ia kane ka jingleh niam la leh ka San Kur bad Khadwei Kur jong ka Raid Mylliem, da ka knia ka khriam, da ki blang lieh sada kaba khlem thoh dak ei ei bad u sniang iong ba khlem thoh dak bad ki syiar ban nguh ban dem katkum ki riti dustur jong ka hima bad ka raid.
La sdang na khlieh Iewduh ha kaba la pyndep ia kane ka niam ka rukom ha kaba ki khun ki hajar jong ka hima khamtam eh na ka kur san kpoh bad khatwei kpoh jong ka Raid Mylliem, ha ka jingdonlang u Pa’im Ricky Nelson Syiem, u Syiem ka Hima bad kiba khraw ba tri ka Hima.
Hadien ka jingleh niam na Khlieh Iewduh la wan ban pyndem sa ia ka niam ka rukom ha kjat jong ka Iewduh ryngkat ka knia ka khriam ha Basa Tympew bad la but sa ka shad ka kmen da ki khun ki hajar jong ka Raid Mylliem.