“Pyndep hapoh shisngi” hukum ka Russia ia ki saiantis, ba kin wad ia ka dawai ban nym pyntymmen shuh ia U Putin

Ka jingrhah shuki, ka pynlong ia u briew, ba un leh ia ki kam khyllah ba har rukom bad don kiba kwah ban shong sah ha ka shuki kaba khlain bor, wat lada ka dei ban pyniap ne pynjynjar sat ia kiwei pat bad katei ka la jia ia U Vladimir Putin, President jong ka Russia, ha kaba ula pynmih ia ka hukum jongu, ha ki khyndiat sngi ba ladep, ba ki saiantis, kin wad kyrkieh ia ka dawai, ka ban nym pyn tymmen shuh ia u, namar ba u bang palat ban shong ia ka shuki President ha katei ka ri bad u kwah ba un synshar junom la junom.

U Putin, u don mynta 71 snem ka rta jongu bad u da kwah palat ban pynlyngkot ia ka rta jongu, da ka bor jong ka jingstad saian bad ba un ioh biang ia ka jinglong samla kaba pura, kumba u ju long ha ki phew snem ba ladep.

Katei ka hukum, ka dei kaba la pynmih na ka tnat jong ka koit ka khiah ka sorkar Russia, ha kaba la bthah ia ki saiantis na Russia, ba kin wad kyrkieh ia ki dawai ban pyn samla biang ia U Putin. Don ki saiantis, kiba kynthoh “La bthah ia ngi ba ngin leh kyrkieh kyrkieh, ha kaba ngi dei ban ai ia ka kaiphod hapoh ka shisngi”.