Pyndem ka sorkar ha u Lat, yn pan jingmut na ki paidbah ia ka VAB

Shillong, 21 Jylliew:
Ka sorkar jylla ka la hap ban pyndem ha ka jingkwah jong u Lat ka jylla u u V Shanmuga nathan ba dei ban pan jingmut shwa na ki paid bah halor ka Village Administration Bill (VAB) ka KHADC.
Dang shen, u Lat ka jylla haba pynphai biang ia kane ka Bill ka KHA DC u la ong ia ka sorkar ba kan long kaba kham bha  ban pan jingmut shwa na ki paidbah halor kane ka Bill kaba la wanrah ia ka jingthalain nia na kiba bun ki kynhun bad ki riew paidbah.
Halor kane, ka khubor na ka sorkar ka la iathuh ba ka sorkar jylla mynta ka la don ka jingpyrkhat ba kan buh ia kane ka VAB ha ki paidbah ban pan jingmut. Ka tnad ain ka sorkar jylla ka la eksamin ia kane ka Bill kaba la pynphai u Lat bad la sngewthuh ba ka lah ban ai jingmut ia ka sorkar ba kan buh ha ki paidbah ban ai jingmut halor kane ka Bill.
Mynshem taiew, u Lat ka jylla u la pynphai biang ia kane ka Bill sha ka sorkar ha kaba u la pan jingshai shuh shuh ha ki katto katne ki kyndon kiba la bsuh ha kane ka Bill.
U Lat u dang eksamin ruh ia ki bill jong ka Jaintia Hills Autonomous District Council (JHADC),  kaba la phah sha u dang shen.
Kine ki bill jong ka KHADC bad ka JHADC la pass ban pynkup bor ia ki Rangbah Shnong hadien ba la shah sloit naphang ha ka Kashari High Court ka Meghalaya.