Pyndem 4 ngut ki GNLA; U Area Commander bad u nongpahara u Sohan

Shillong,24 Rymphang: 4 ngut ki lehnoh GNLA ki la wan ban pyndem mynta ka sngi ha ki pulit ka Williamnagar, East Garo Hills. Napdeng kitei ki 4 ngut uwei dei u nongpahara uba don hakti hajan jong u hehduh katei ka seng ha ki por mynshuwa hynrei shuwa ban wan pyndem u la don noh ha ka kynhun jong u Sengbat Ch Momin. Uwei na ki la ong ba dei uba la shah thung kum u Area Commander ha u Sohan D Shira bad uwei pat dei u nongpahara shimet jong u, iathuh u Director General of Police S B Singh sha ki lad khubor.
Lai ngut na kitei ki dkhot ka GNLA ki dei kiba la tip kyrteng kum u Wesefield Ch Marak ba ju khot sin kum u Dakchak na New Sampalgre (Williamnagar), u Joshua N Marak ba khot sin u Kolgrik kumjuh ruh ki khot sin u Balmika na Bajengdoba -North Garo Hills, u Tush M Marak ba ju khot sin u Gotcheng bad Jachong na Gasuapara ba sah ha khappud ha South Garo Hills. U Joshua dei u nongpahara shimet jong u Sohan kham mynshuwa shuwa ba un leit sha ka kynhun kaba hapoh jong u Sengbat.Kitei 3 ngut ki la pyndem ryngkat ka AK 47, AK 56, SLR, 4 AK magazines, 3 SLR magazines, 2 walkie talkie, bad bunbah ki kuli, ki kot ki sla jong ka GNLA.