“Pyndam noh ïa ka projek bording, pynneh pynsah ïa ka Wah Umngot”

Shillong:Ka Joint Action Committee, ba pyrshah ïa ka Umngot Hydro Project ha ka Sngi Thohdieng, ka la dawa ïa ka tnat bording jong ka sorkar jylla, ba kan pynmih da ka jingthoh kaba shai ban pynthi kna ba ka la weng ïa ka jingthmu ban tei ïa ka projek bording ha katei ka thaiñ.

Haba kren bad ki lad pathai khubor hadien ka jingïalang, u Vice Chairman ka JAC, Bah Pynskhem Mukhim u la ïathuh ba wat la ka sorkar ka la dep ban kular ban pynduh pyndam noh ïa ka jingthmu ban tei ïa ka Umngot HEP. hynrei ki jingthoh ba ki ïoh pdiang man ka por ki pynartatien ïa ki.

“Sa shisien ngin leit ban kynduh biang ïa ka sorkar ba kan pynthikna beit da ka jingthoh kaba shai ba ka la pynduh pyndam noh ïa katei ka jingthmu shijunom,” bynrap biang u Bah Pynskhem.
U la ïathuh ruh ba ka jingartatien bad kaba pynsyier ïa ki kadei halor ka jingthoh kaba wan na ka tnat bording ha u Rymphang mynta u snem kaba ong ba ka sorkar ka la pyndam ïa ka projek bad kita ki private party.

“Kane ka mut tang ïa kito ki kompeni ba ka khot tender mynshwa ban pyntrei ïa ka projek. Ka JAC ka kwah ba ka sorkar kan pynthikna ba kiwei kiwei ki kompeni hadien ruh kin ym lah ban pyntrei ïa katei ka projek,” ula ong.
Na ka liang u Bah Reachingson Kongwang, Chairman Darrang Tourism Society u la ïathuh ba ka pyrthei baroh kawei bad wat u Prime Minister ka Ri u Narendra Modi ruh u la ïaroh ïa ka Wah Umngot kumta “Ngi ruh ngi kwah ba ka sorkar kan pynneh pynsah ïa ka Wah Umngot da kaba pynduh pyndam noh ïa ka projek bording”.

La pyndam ia ka Umngot Projek, ong U SMR
U myntri ba dei peit ia ka tnad bording ha ka jylla u bah Prestone Tyn song, u la ong ha ba iadei bad ka Um ngot Hydro Power Project, na ka liang ka sorkar ka la dep ban pyndam bad kam don jingthmu shuh ban trei ia kane ka project.

Haba ia kren bad ki lad pathai khubor u bah Tynsong u ba long ruh u Symbud Myntri rangbah ka jylla, u la ong ba ha ka por ba la rai ban pyndam, ka mut ba la pynduh noh syndon bad kim don shuh kano kano ka jingthmu ban pyntrei kam ia kane ka project.
U la ong “Haba kine ki kynhun ki la wan ban ia kynduh ia u ki la buh ka jingkyrpad ban pyndam noh ha kaba nga la iathuh ba ka jingpyndam ka mut ba ngi la pyndam noh ia ka soskular bad ngin ym don shuh ka jingthmu ban pyntrei ia kane ka project”.

“Lada ki iohi ba na ka liang ka sorkar kan pynmih thymmai ia ka EOI te ka jingthmu jong ka sorkar ka long ban khot ia kiwei ki party ban khot na ka bynta ban iasoi biang ia ka MOU”u la bynrap.
Hynrei ha ba ki la iohi ba na ka liang ka sorkar kam shem la shim shuh ia kano kano ka sien jam, ka mut ba ka sorkar ka la pynduh noh syndon ia kane ka jingthmu halor kane ka project.