Pyndam ML01 ia ki bos sorkar

Shillong, 12 Nailar:
Ka BJYM ka la dawa ba ka sorkar jylla ka dei ban pyndam noh ia ka jingthoh ML01 ia baroh ki kali sorkar bos sawkhmut bad ba dei ban phah siew khajna kumba leh ia ki kali kamai.
Mynta ka sngi, ka BJYM ka la aiti ia ka dorkhas ha u Myntri tnad pyniaid kali u Bah HDR Lyngdoh hynrei namar ba um pat don ha ophis, la ai noh tang ka kopi.
Haba kren bad u President ka BJYM u Bah Egenstar Kurkalang u la ong ba ka seng ka la dawa ba ka sorkar ka dei ban pyndam noh shi syndon ki number sorkar ba la thoh ha ki kali saw khmut bad ka dei ruh ban siew khajna sha ka sorkar.
“U Number ML01 dei ban pyndam bad ki dei ban siew khajna kumba siew jong kiwei ki kali kamai”, la ong u Bah Kurkalang bad bynrap ba ka dor ruh kaba ki shim na ki nongshong bos ka long kaba rem bad ka sorkar ka dei ban pyrkhat bha halor kane.
Mynta ka sngi ki dkhot ka BJP ryngkat ka seng jong ki kali kamai, ki la pynlong ia ka jingdeng lama iong baroh kawei ka Khasi Hills ban pynpaw pyrshah ia ka jingai iaid laitlan ka sorkar ia ki bos sawkhmut bad ki bos saw rit khlem da siew khajna nalor ka jingshim ia ka dor kaba rem na ki nongshong kali.
U Bah Kurkalang u la ong ba palat shiphew hajar ki paidbah kin iashim bynta ha ki bynta bapher bapher jong ka Khasi, Jaintia Hills, ban deng lama bad sieh lama ha man ki jaka.
Ka BYJM ka pynlong ia ka jingiakhih ba jai jai lashai ka sngi ban pyrshah ia ka jingai laitlan ka sorkar ia ki bos saw ban kamai sahuh khlem siew khajna eiei sha ka sorkar.
U Bah Kurkalang u la ong ba ki bos saw ne STPS bad ki bos rit ne SSPTS ba pyniaid da ka sorkar jylla ki iaid kim siew khajna eiei bad ki shu kamai sahuh beit nalor ka dor khrong ruh kaba rem.
Katkum ka jingong jong u President ka BJYM ki bus STPS bad ki bos rit SSPTS watla ki kamai kum ki kali kamai hynrei kim siew eiei ka khajna sha ka sorkar kaba long pyrshah ia ka Motor Vehicle Act.