Pyndam ka HSPDP ia ka Ri-Bhoi bad E&W Jaintia Ki riew barim ki la tlot bad noh karta, kwah pynkhlain thymmai:Ardent

Shillong, 22 Naitung:
Ha ka jingialang jong ka CEc ka HSPDP kaba la long ha ka sngi saitjain , ka la shim ia kiba bun ki rai , bad kawei na ki rai jong katei ka Committee ka dei ban pynduh pyndam noh ia ka seng HSPDP ha Ri-Bhoi bad ha Jaintia hills district ba kynthup ia ka East bad ka West Jaintia.
Haba ia kren bad ki nongthoh khubor u bah Ardent M Basaiawmoit, CEM ka KHADC uba long ruh u Vice President ka HSPDP u la ong ba ka daw ba la pynduh noh ia ka seng ha kitei ki 3 tylli ki District ka dei na ka daw ba ka seng ka kwah ban khring ia kiwei pat kiba kwah ban don hapoh katei ka seng khnang ba kan nang kham khlain shuh shuh hapoh ka jingtreikam jong ka. Haba la kylli ia ka daw ba ka HSPDP ka la shim da kat katei ka rai ban pynduh syndon ia ka seng ha kitei ki District u bah Ardent u la ong “ Ki briew ba kham rim ki la tlot bad kham noh karta , ka seng ka kwah ban ailad ia ki briew ba kin ioh rung dkhot thymmai”. Utei u nongialam ka HSPDP u la iathuh ba kumba ka long mynta ka seng ka treikam bha tang ha West Khasi Hills, East Khasi Hills bad Shillong City.
Halor katei ka juh ka phang u Rupang u la ioh ruh ban ia kren kham bniah bad u bah Witting Mawsor uwei na ki nongialam katei ka seng na West Khasi Hills, ha ka jingiakren u bah Mawsor u la iathuh ba ha ka por ba ka seng ka la shim ia katei ka rai ki la donlang ki nongialam na kitei ki District kiba la shah pynduh noh, u la ong ba shen ha u bnai ban wan ka seng kan thaw thymmai noh ia ka tnad jong ka ha kitei ki District, u la ong ruh ba haduh ki dang ap ia ki nongialam ba shitrhem kiba kwah ban trei hapoh ka seng ba kin wan ia treilang. U bah Witting u la ong biang ba kam shym la don kano kano ka jinjgiasngewsih ne ka jingiapher jingmut bad ki nongialam na kitei ki District hynrei la ia kren da kaba sngewthuh jai bad ki ruh ki la pdiang ia katei ka rai. Haba la kylli la ki la don ki nongialam na kano kano ka Party ne ki MLA ki MDC ba mynta kiba la don ka jingiakren ba kin pyniasoh HSPDP noh, u bah Witting u la ong ba haduh mynta kim pat don. Haba la kylli pat la u Pastor PBM Basaiawmoit un dang leit ban pyniasoh biang sha ka HSPDP, u bah Witting u la ong ba ka ain ka Synod kam shah ia u Pastor ba un long uno uno u dkhot ba pura jong kano kano ka seng sain pyrthei na kata ka daw um don hapoh ka HSPDP.