Pyndam ia ka ain shongwai:Bindo

Shillong, 11 Nohprah:
U Working President ka UDP Bah Bindo Mathew Lanong u la kyntu ia u Myntri Rangbah u Mukul Sangma ban pyndam noh ia ka Meghalaya Landlord and Tenants Verification Bill, 2013. “Ka sorkar ka dei ban pyndam noh shi syndon ia kane ka Bill shongwai iing namar ba ki paidbah ki la kyntait ia ka. Ka sorkar ka dei ban peit da kawei ka lad kaba kham biang ban khang lad ia ka jingwan rung ki briew nabar sha kane ka jylla” la ong u Bah Bindo. U la ong ba lada ka sorkar ka dang ailad ia ka jingiakhih, kan wanrah shuh shuh ia ka jingma ha ka liang ka roi ka par bad ka ioh ka kot jong ka jylla.
“Ka sorkar ka lah ban buh ia ka bol ha ki sengbhalang, bad ka dei ka kamram jong ka sorkar ban khot sha ka jingiakren bad ki sengbhalang”, la ong u Bah Bindo. U Bah Bindo u la ong ba nalor ba la ai jingmut ia ka ILP, ka High Level Committee on Influx HLCoI) kaba khlieh da ma mu, ka la kdew ruh ia ka ID card system kumba la tyrwa da ka kynhun ha ka por ba long myntri u Bah Thrang Hok Rangad bam kwai ha duwar u Blei ha u snem 2001.
“Ka working group ka la tyrwa ia ka ID card nalor kiwei pat. Ha ka jingshisha, ki ophisar IAS barim kynthup Bah Toki Blah ki dkhot ka HLC ki la ai jingmut ban pyntreikam da ka ID card”, la ong u Bah Bindo. U la ong ba ka ID card ka kham bunkam hynrei ka sorkar ka lah ban ai jingmut sha ki sengbhalang ba kin pyrkhat biang. U la ong ba ka long kaba bakla ban ong ba ka ILP ka dei ka kam jong ka sorkar pdeng hynrei ka dei ka kamram ka sorkar jylla.
“Ka jingphah sha ka sorkar pdeng ia ka jingpyntreikam ia ka ILP ka long tang ka jingpyntip ban shu pyndep rukom”, la ong u Bah Bindo.