Pyndam ïa ka aiñ ïa khalai hapoh 7 sngi ne mad ïa ki jingïakhih: HITO

Shillong: Ka seng Hynñiewtrep Integrated Terrestrial Organization (HITO) mynta ka sngi ki la leit ban buh ïa ka shithi ha u Myntri Rangbah ka jylla ban pynpaw ïa ka jingpyrshah ïa ka rai ka sorkar jylla ban pynlong ïa ka jylla kum ka ktem khalai lyngba ka jingwanrah ïa ka Meghalaya Regulation of Gaming Act 2021.

Haba kren sha ki lada pathai khubor na ka liang u President ka HITO u Bah Donbok Dkhar u la ïathuh ba ka daw ka jingpyrshah ka dei beit ba kane ka jingthmu ka sorkar kan long u symbai jong ki kam sniew ha ka jylla.

Shuh shuh na ka liang u Bah Donbok u la ong ba ka jylla Meghalaya la ju nam kum ka jylla Khristan kumta ngim kwah ba kan kylla long mynta pat ka ktem ki kam khalai.

Haba pynpaw ïa ka jingpyrshah ïa ka jingïapynhap ka sorkar ïa ka siat tim ha ka thup ki ka kam khalai kumba paw ha ki kyndon ka Meghalaya Regulation of Gaming Act 2021 u la ong ba baroh shi katto la ju ong ba kam tim ka hap ha ka thup ki kam lehkai balei kan pynhap sha ki kam khalai.

Na ka liang ka HITO ka la ai por ïa ka sorkar da 7 sngi ban pyndam ïa kane ka aiñ lym kumta ka la ong kan shim da ki sienjam ba tyngeh pyrshah ïa ka sorkar.