Pynbna U Mukul ban plie sa 2 tylli ki Block

Shillong,7 Naitung:
Ka jingiakhih jong ki nong Mawlai halor ka C&RD Block ka la pynioh nong kha ma kha ia ka Mawpat ha kaba mynta ka sngi u myntri rangbah ka jylla u Mukul Sangma u la pynbna ba yn plie syndon ar tylli ki Block kata ka Mawlai C&RD Block kan hap beit tang ia ka Mawlai baroh kawei katba kawei pat ka dei kaba kynthup ia ki shnong kiba hap hapoh ka Pynthor -um khrah konstitwensi, Nongthymmai konstitwensi bad katto katne tylli ki shnong jong ka Mawryngkneng konstitwensi.
Wat la u myntri rangbah um pat jer kyrteng ia katei kawei pat ka Block kaba yn plie thymmai hynrei la sngewthuh ba kan dei hapoh Mawpat naba ka Mawpat ka la dep pynbiang pynbit lypa ia ka jaka ruh naduh ka por ba ka mih ka jingiatan tyllai ia ka Mawlai C&RD Block.
Mynta ka sngi u Mukul u la khot ia ka jingialang kaba la wan ban ia shim bynta da ki 4 ngut ki MLA kata u bah Embhah Syiemlieh , MLA ka UDP na Mawlai, u bah A.L Hek MLA ka Congress na Pynthor-umkhrah, u Dr.Jemino Mawthoh ka UDP na Nongthymmai bad u bah David Nongrum na Mawryngkneng, la don ruh u MDC ka Congress na Mawlai u bah P.T Sawkmie kumjuh ruh la donlang ki nongsynshar shnong na kitei ki saw tylli ki konstitwensi.
La don ruh u myntri sorkar ba peit ia ka C&RD Block u ma Sniawbhalang Dhar, u bah Ronnie V Lyngdoh, myntri pynroi sor.
Haba kren sha ki nongthohkhubor hadien ba la wai katei ka jingialang u Mukul u la ong ba mynhynin ka miet u la shong jingialang kyrkieh bad ki katto katne ngut ki ophisar bad la shim ia ka rai ha katei ka jingiakynduh ban ai beit baroh ar tylli ki Block bad la pynshong nongrim ruh katkum ka jingbun briew ha kitei ki ar tylli ki jaka.
U la ong ba ka Mawlai kan kynthup ia baroh ki shnong jong ka Mawlai konstitwensi bad ka jaka ban tei ia ka Block ka dei ha Mawtawar kumba ki la tyrwa bad shen u la ong ba un phah ban jurip ia ka jaka ban sdang noh ia ka kam.
Katba kawei pat ka block kaba um pat jer kyrteng u la ong ba kan kynthup ia ka Nongthymmai, ka Pynthor-umkhrah bad katto katne tylli ki shnong ba hap ha Mawryngkneng konstitwensi kiba don ha ki thaiñ Mawdiangdiang.