Pynbna ka sorkar Punjab, ban ai ei bor ding 300 unit shi iing, ha ka shibnai

CHANDIGARH: U Bhagwant Mann, myntri rangbah ka Punjab, mynta ka sngi, ula pynbna ban pyntreikam ia ka jingai ei bording, ia kito kiba bam ding hapoh 300 unit shibnai bad kiba thang ding ha ki iing shong iing sah jongki, kaba sdang naduh ka 1tarik Naitung 2022.

U Mann, u pynbna pat, ba kito kiba thang ding palat ia ka 600 unit ha ka ar bnai, kin lait noh, na katei ka jing aiei bor ding bad kin hap ban siew pura ia ka bai thang ding.

La ong shuh shuh ba ki kynhun Scheduled Caste bad ki nongialeh laitluid, kiba ju ioh ei ia 200 unit ka bor ding, mynta kin ioh ei 300 unit bad yn khein dor, lada jia ba ki pyndonkam palat na katei kaba la mang. U myntri rangbah, u pynshai ruh ba ka jing aiei bor ding ia ki nongrep, kan dang iai bteng ha ka jylla, ha kaba ka jing ai ding kaba duna dor, kan dang iai bteng ha ki karkhana.

U Mann, u ong ba ka Punjab, ka dei ka jylla, kaba pynmih bor ding bad u ia nujor, ba ka Delhi, ka dei kaba shu thied bor ding na ki ar tylli ki kompeni jong ki riew shimet, hynrei, ka dang ai ei bor ding ia ki 73 percent ki nongshong shnong jong katei ka jylla rit. U Man, u pynbna ruh, ban map bor ding noh, ia kito ki long iing, kiba khlem siew bor ding, haduh ka 31tarik Nohprah 2021, kiba bam ding, hapoh ka 2 kilowatt.

Ka sorkar AAP, ka la pynurlong ia ka jing kular jongka, ha shwa ka elekshon MLA, kaba la pynbna da U Arvind Kejriwal, nongialam ka seng AAP, ha ka 29tarik Jylliew, 2021.

Lyngba kane ka rai, ka sorkar AAP, ka la shim ia ka rai, kaba ym pat don sorkar satia, kaba la shim ia katei ka rai, kaba rad bah ha ka Ri India hi baroh kawei bad lyngba katei ka rai, kin don 80 percent ki nongshong shnong ka Punjab, ki ban ioh ei bor ding. Ki don 73 lak ki iing ha Punjab, ha kaba na kitei kin don 62lak tylli ki longiing, ki ban ioh jingmyntoi na kane ka rai jong ka sorkar jylla.

Ka jinglut jong ka sorkar jylla, na ka jingai ei bor ding, kan long T.1,300 shibnai. Ka jingbam bor ding ha Punjab, ka long 8,000 MW bad ynda la dei ka por thung kba, kan kiew ka jingbam bor ding sha ka 15,000 MW.