Pynbna ka kong Fenella ba kan ym ia khun elekshon ha u 2018

Shillong, 31’lyngkot:
Ka kong Fenella Lyngdoh Nonglait ka la pynbna mynta ka sngi ba kan ym ia khun elekshon ha u 2018, ka kong Fenella ka la phone sha une u nongthohkhubor ban pyntip ia katei ka rai jong ka na ka bynta u 2018 bad ka la ong ba ka la shim ia katei ka rai namar ki daw shimet jong ka, “Ki paidbah kiba bun na Mawthadraishan na Nongstoiñ ki la phone ia nga bad ki kylli shi kylli la ngan ia khun elekshon ne-em” ong ka kong Fenella. Ka kong Fenella ka la ong ba khnang ba ki paidbah kin shai ka la pynlong ia ka ban phone noh sha u nongthohkhubor ban pyntip ba kan shongthait shuwa ha u 2018.
Lah ban kdew ba ka kong Fenella ka la iakhun elekshon ha u 2013 na Mawthadraishan konstitwensi na ka seng HSPDP hynrei ka la shah rem noh ha u bah Brolding Nongsiej ka UDP. Ha ka elekshon shiteng samoi ha Nongstoiñ konstitwensi kaba la long ha u 2015 –ka la iakhun kum ka kyrtong shimet bad hangtei ruh ka la shah rem ha u kyrtong ka HSPDP u bah Diosstar Jyndiang. Ka kong Fenella ka dei ka pyrsa kur jong u maieit Hopingstone Lyngdoh ( Bam kwai ha dwar u blei) bad ha katei ka elekshon shiteng samoi ka la pan tiket na ka seng HSPDP hynrei kam shym la ioh tiket. La kylli na ka kong Fenella iano kan kyrshan haba ka la dep ban shim ia ka rai ban shongnoh ha u 2018-ka la ong ba haduh mynta kam pat rai ban kyrshan iano iano ruh bad kan sa peit pat kham hadien.