Pynbna ïap ka BJP ia U Vinod Khanna, kynnoh ia ki Social Media

Shillong, 9 ïaiong:
Hadien ba ka la pynbna ïap ia u Vinod Khanna ka BJP ka la kynnoh kylla ba katei ka jingbakla ka dei tang na ka daw ka jingpynphriang khubor ha ki social Media. Ha ka sngi sait jaiñ jong ka taiew ka la don ka jing ialang rakhe 34 snem ka BJP ha Jhalupara bad ka la don ka prokram Swachh Bharat Abhiyan. Shuwa ban sdang katei ka prokram u General Secretary ka BJP u bah David Kharsati u la ong ba dei ban kynmaw burom shuwa ar minit ia u Vinod Khanna ( U Aktor kumjuh ruh u MP ka seng BJP na Gurdaspur, Punjab) “Shuwa ban sdang ia ka prokram ngin sngap jar 2 minit ban kynmaw burom ia u Vinod Khanna uba la khlad noh” ong u bah David ha katei ka jingialang.Katei ka dei ka jingkren ha ka jingialang kaba la donlang u National Vice President ka BJP u Avinash Rai Khanna, u Jagdamba Mall uwei na ki nongialam rangbah bad ki nongialam ka BJP na kane ka jylla.
Hynrei hadien ba la ioh jingtip ba u Vinod Khanna um pat iap u bah David Kharsati u la phah kyrwoh sha ki lad pathai khubor ba katei ka jingbakla ka dei namar ka jingpynphriang khubor ha ki social media, hynrei u Vinod u dang don hapdeng ka jingshah sumar, u la kitbok kitrwiang ba un shait un khlain noh. U Vinod u la jop MP Lok Sabha ha u 2014 hadien ba u la pynliem ia u kyrtong ka seng Congress u Pratap Singh Bajwa na Gurdaspur, Punjab-mynta u don hapdeng ka jingshah sumar ha Sir HN Reliance Foundation Hospital, Mumbai.