Jowai: Na ka daw ba la pur u Khniang jingpang Covid-19 ha ki katto katne tylli ki longiing ha ka nongbah Jowai, na ka liang u District Magistrate ka West Jaintia Hills u la pynbna ba ha kitei ki iing bad phyllaw kin long ki containment area naduh mynta hi ka sngi haduh ban da pynbna da kumwei pat.
Kitei ki longiing kiba la shah pyngngat bad shah teh hapoh ka containment area ki kynthup ia ka iing bad phyllaw ka kong Wiwo Siangbood, Rihun Kharuki, Diamon Challan kiba don ha Tpep Pale, Jowai bad ka iing jong ka Bunki Lanong, Soilin Lanong, Poibiang Lanong ha Chilliang Raij, Jowai.
Na ka liang u District Magistrate u la mana bad khang pyrshah ia ki dkhot jong kitei ki longiing ban mih shabar na ka iing jong ki bad ruh la khang ia ki nongshong shnong bad kiwei kiwei kiba nabar ruh ban iarung iamih sha bad na katei ka jaka ba la pynbna kum ka Containment area.
Baroh ki dukan bad kino kino ki jingialum paidbah la khang ha kitei ki jaka ban pyntikna ba une u Khniang jingpang Covid 19 un nym ioh lad ban saphriang sha kiwei pat. Baroh ki ophis sorkar lane ki ophis jong ki riew shimet lane ki skul kiba don hapoh kitei ki jaka kin khang kyrdep lut.
U Assistant Sector Magistrate, Jowai Urban un long u sahep u ban peitngor ha kine ki jaka ba la pynbna kum ki containtment area.
Kane ka hukum kan nym ktah satia iaki nong trei ka tnad ka koit ka khiah bad kiwei kiwei kiba trei na ka bynta ban iarap ia ki paidbah kiba na ki tnad bapher bapher kumjuh ia ki lad pathai khubor.
Kiba pynkhein ia kane ka hukum kin shah pynshitom katkum ka ain jong ka Pandemic Disaster Management Act, 2005 nalor kiwei kiwei ki kyndon jong ka Indian penal Code.
Phi don ban ong eiei?