Pynbna biang ban thungkam ha Meghalaya House, dawa ka GHSMC

Shillong, 15 Naitung:
Ka Garo Hills State Movement Committee (GHSMC) ka la dawa na ka sorkar ba ka dei ban pynmih jingpynbna biang na ka bynta ki kam Grade IV ba lait ha Meghalaya House ha Kolkata.
“Na ka bynta ka jingbit jingbiang jong ki paidbah ka jylla Megha laya, ngi dawa ban pynkynriah ia ka tarik ba la khot ban thungkam bad dei ban pynbna ha ki kot khubor phareng, Khasi bad Garo”, la ong u general secretary ka GHSMC u Augustine R Marak ha ka shithi ba la phah sha u myntri ka tnad GAD Bah HDR Lyngdoh mynta ka sngi Hatmajai.
Ka tarik ba khadduh ban pdiang ia ki aplikeshon la buh ha ka 30 tarik Jylliew.
U Marak u la ong ba ka jingpynbna ia ki kam Grade IV la pynmih tang ha ki kot khubor Khasi bad ym ha kiwei ki kot khubor Garo.
“Namar ba ka jylla Meghalaya kam dei ka jylla ba dei tang kawei ka jaitbynriew, namar ba ka ktien Khasi ym don ba sngewthuh lut khamtam ki Garo, ka la dei ia ka tnad ba kan pynmih biang ia ka jingpynbna”, u la ong u Marak.
U la pynpaw ia ka jingsngew bynniaw ki tnad sorkar kim shym la burom ia ka bhah kam kaba 40 percent ia ki Garo katkum ka Reservation Policy, 1972.
U la kyntu ia ki bor ba dei ban pynbeit ia kane da kaba pynmih biang ia ka jingpynbna na ka bynta kane ka kam.