“Pynbha ia ka surok Bhoirymbong hapoh 20 sngi”

Shillong, 20 Nailar:
Ka Confederation of Ri Bhoi People (CORP) Eastern Zone ka la pyn long ia ka jingjurip ia ka surok na Bhoirymbong sha Mawlasnai ha kane kine ki sngi Balang ban lap ia ka jinglong jingman jongka namar ka jing sniew palat. Ka CORP ka ai por hapoh 20 sngi ia ka tnad PWD ba kan maramot ban pynbha noh ia katei ka surok bad kumjuh ula kyntu jur ia ki arngut ki MLA jong ka Umroi bad Mawhati konstitwensi ban shimkhia lem na bynta ban pynbha ia ka surok Bhoirymbong shaduh Mawlsnai kaba long u budlum ia ka roi ka par jong ki paidbah ka thain naduh Block-II.
“Lada kim leh, ka seng kan sa pyrkhat ban leh da kiwei ki lynti”, la ong u bah Bandary Ryntathiang uba dei u president ka CORP Eastern Zone.
U la ong ba ha kane ka jingleit jurip, la lap ba kane ka surok kaba dei u budlum ka iaid ka ieng bad ka ioh ka kot jong ki paidbah katei ka thain, ka long kaba sniew palat shisha.
Ki nongialam ka seng ki la lap ba la bun ki thliew ki syar ha kane ka surok bad ka long ka jingeh ia ki paidbah ha ka iaid ka ieng.
U Bah Bandary ula ong ba ka seng ka la pynlong ia kane ka jingjurip hadien ba la ioh ia ka jingud jingnam na ki paidbah ka thain. U la ong ba ha kane ka jingjurip ia katei ka surok la lap ba ka la sniew shaba palat, kaba la buh jingeh ia ki paid nongleit nongwan na ka jinglong thliew jong ka surok.
“Ka jingleh sting ka tnad PWD ka la ktah ia ki paidbah ne ki nongkhaii ba kim lah shuh pyndep ia ki kam namar ba ka shimpor da ki bun kynta ban iaid lyngba katei ka surok,” ula bynrap.
U la ong ba ki paidbah na ka thain kynthup ia ka shnong Mawbri, Thadnongiaw, Liarbang, Liarkhla, Khlieh Umstem, Mawlasnai haduh Umtngam bad kumjuh na thain Block-II, haba ki wan ban pyndep ia ki kam ki jam ha Shillong, mar iapoi sha Bhoirymbong ki sngew kumba ki lait ksuid ban iaid na ka surok Bye pass, hynrei ynda ki la wanphai tang mar ia poi ha Bhoirymbong ki jew slew ka mynsiem ban iaid ia ka surok kaba khohruh khohram bad shimpor da ki kynta ban poi sha la iing.