Pynbeit ka UDP ban shong thait mon sngewbha U Dr Don

Shillong, 14 Rymphang:
Ka jingjied ia u President ka UDP ha kane ka kynti kan long kaba kham shongshit bha namar ka jingmih kyrteng bun ngut, kiba thrang ban shimti ia kane ka kam nongialam ka party.
Ha ka seng UDP, ban jied president kam dei ban pynlong da ka elekshon hynrei ka dei kaba ju thung ne jied da ka Nomination Committee ka ban don katto katne ki dkhot bad kin wanrah ha ka jingialang ban shu ia rah kti ban pynskhem. Hynrei, katkum ka jingtip, ka la don ka jingsngew kulmar napdeng ki nongialam ka party, iano ban pynlong President namar ba ha kane ka kynti, ki don bun kiba kwah ban shimti ia ka kam President lada plie ka lad.
“Ka jingiakren bad u Dr Don bad ha ka party ka dang iaid mynta, lada u sngew dei ban shong thait sngew bha noh kum u President”, la ong ka tyllong khubor.
La iathuh ba ka daw ba ki kwah ban iapynbeit iasyllok bad u Dr Don ba un shong thait mon sngewbha, ka long ban nym don kano kano ka jingiaknieh shuki iaknieh bor ia kane ka kam nongialam ka party.
Kiba la pynpaw ba kwah ban shimti ia ka kam President lada ki ioh lad ki long u Bah Bindo M. Lanong uwei na ki nongialam ba neh naduh ka por ka party riewlum ka APHLC , u Bah Paul Lyngdoh uba phet noh na ka KHNAM, bad u Bah Titus Chyne uba long mynta  u MLA ka Sohra.
Watla u Dr. Donkupar Roy um pat kren eiei halor kane, hynrei ka la don ka jingiakren na ki nongialam ka party khnang ban plie lad ia kiwei pat ki nongialam ban shimti ia kane ka kam.
Ka UDP ka don ka Nomination Committee kaba jied ia ki Nongkitkam jong ka Party, kynthup ia u President. Ia u Dr. Donkupar Roy ruh la jied da ka Nomination Comittee.
La ioh jingtip ba kito kiba kwah ban long President, mynta ki la sdang ban kanbas ia ki dkhot jong ka Nomination Committee, khnang ba kin ioh ia ka jingbun paid ha ka jingiatyrwa kyrteng ia u President bad kiwei kiwei ki nongkitkam.