Pynbeit ia ka dor bai Taksi, ong ka Sur U Paidbah Ka Bri Hynniewtrep

Shillong:Myn hynnin ka sngi ka Sur U Paidbah Ka Bri u Hynniewtrep ka la thoh sha u myntri rangbah ka jylla, u Conrad K Sangma ban kyntu ia ka sorkar ban pynbeit ia ka dor bai kali khamtam ia ki Taksi ki ban kamai hapoh ka nongbah Shillong.

Ka Sur u Paidbah Ka Bri u Hynniewtrep, lyngba ka shithi ka la pynpaw ba hadien ba ka sorkar ka la shah iaki taksi ban kamai ka la bthah ba ki dei ban kit tang 3 ngut ki briew ryngkat ha ka dor kum ba ju long mynshwa.

Ka Sur u Paidbah Ka Bri u Hynniewtrep ka la kyntu ia ka sorkar ban pynbeit ia ka dor thymmai na ka bynta ban iarap ruh ia ki draibar taksi, lada ki kali kamai ki hap kamai ryngkat ka jing bud ryntih iaki kyndon ka tnat ka koit ka khiah. Ka seng ka la kyntu ruh iaka sorkar ban kham pynbun ia ki bos kit nongtrei sorkar kum shi bynta ban kham pynkylluid ia ki bos bad ruh ban bud ia ki kyndon ka tnat ka koit ka khiah ban shong kham pajih na kiwei pat.

Nalor kane Ka Sur u Paidbah Ka Bri u Hynniewtrep ka la kyntu ruh iaka sorkar ban pynbiang ia ki jing ai jing sumar ia ki paidbah hadien ki la mih ka jing kynthoh ba ka CHC ha Mawryngkneng ha ka 25 tarik jymmang 2020 ka la kyntait ban ai jing sumar hapoh ka CHC.
Haba dei bad ki nongrep, na ka liang Ka Sur u Paidbah Ka Bri u Hynniewtrep ka kyntu ruh iaka sorkar ban ai jing iarap ia ki nongrep ka jylla naka bynta ban ioh kheit ia ki mar rep jong ki kum ha kane ka por ba dei por ban kheit ia ki mar rep jong ki ban ioh die namar bun ki nongrep ki shim ram na ki Bank.